Xelq'ara kechürüm teshkilati xitay hökümitini, rabiye qadirning oghullirigha özlirini aqlash pursiti bérishke chaqirdi

Xelq'ara kechürüm teshkilati peyshenbe küni bir bayanat élan qilip, xitay hökümitining Uyghur milliy herikitining rehbiri we dunya Uyghur qurultiyining re'isi rabiye qadirning oghli ablikim abdurihimni 9‏ yilliq qamaq jazasigha höküm qilghanliqini qattiq tenqid qilip , xitay rehberlirini ablikim abdurihimge shundaqla alim abdurihim we qahar abdurihimge özini aqlash pursiti bérishke chaqirdi.

Xelq'ara kechürüm teshkilatining bayanatida " xitay hökümiti ablikim abdurihimni yaxo tor shirkitining Uyghurche tor bashqurghuchisigha "musteqilliq üchün küresh" we " bélishke tégishlik mesililer we cheklen'gen jahat" namliq ikki maqale ewetip uningdin bu maqalilerni turda élan qilishini telep qilghan dep eyibligen. Lékin xelq'ara kechürüm teshkilati yaxo tor shirkitining Uyghur tori yoqluqini éniqlidi" dep körsitilgen.

Bayanatta, xitay hökümitining rabiye qadir xanim we a'ilisige qaratqan bésimini tunji qétim 1999‏- yili rabiye qadirni qolgha élish bilen bashlighanliqini we rabiye qadir xanimning 2005‏- yili 17‏- mart küni türmidin qoyub bérilishi bilen bu bésimini téximu kücheytkenlikini tekitlen'gen.

Xelq'ara kechürüm teshkilati bayanatida, dunya jama'etchilikini xitay bash minstiri wén jyabaw we Uyghur aptonom rayoni rehberliridin ablikim abdurihim shundaqla alim we qahar abdurihimge özini aqlash üchün purset bérilishini telep qilishqa chaqirghan. (Omer qanat)