Rabiye qadir xanimning pragadiki ziyariti ghelibilik boldi

Gérmaniyide échilidighan sana'etleshken 8 dölet yuqiri derijilik erbabliri yighinigha qatnishish üchün yolgha chiqqan amérika prézidénti jorj bush, 5- iyun küni chéx jumhuriyitining praga shehride ziyarette boldi we dunyaning herqaysi jayliridin kelgen siyasi pa'aliyetchilerning muhakime yighinigha qatnashti. Yighin jeryanida u meshhur kishilik hoquq pa'aliyetchisi rabiye qadir xanim bilen körüshti.

Yighinda prézidént bush rabiye qadir xanimni Uyghurlarning kishilik hoquq kürishining simwoli süpitide tilgha aldi we " men bügün körüshmekchi bolghan yene bir isyankar bolsa, oghulliri türmide yétiwatqan, xitaydin kelgen rabiye qadir " dédi we rabiye qadir xanimning kishilik hoquq küreshliridin öch élish meqsitide xitayning uning oghullirini türmige tashlighanliqigha ishinidighanliqini bildürdi.

Prézidént bush yene: " rabiye qadirdek mushundaq talant igiliri öz döletlirining eng zor bayliqi, ular armiyidiki qoral-yaraq we yer astidiki néfitlardinmu bekrek qedirlik" dédi.

Xelq'ara kechürüm teshkilati washin'gton ishxanisi asiya-tinch okyan bölümining mes'uli t. Kumar, prézidént bushning rabiye qadir xanim bilen körüshkenlikining , kishilik hoquqni ilgiri sürüsh jehette xitay rehberlikige nisbeten "küchlük signal" bolidighanliqini bildürdi we "rabiye xanim perzentlirining türmige tashlinishi, xitayning siyasiy pa'aliyetchilerning aghzini étish üchün, siyasiy pa'aliyetchilerning gunahsiz a'ile tawabi'atlirini görüge alidighanliqining tipik misali" dédi.

Rabiye qadir xanim chéx jumhuriyitidiki ziyaritini axirlashturup, 6- iyun charshenbe küni washin'gton'gha qaytip keldi. (Jüme)