Prézidént bushning rabiye qadir xanimgha bergen bahasi xitayning naraziliqini qozghidi

Xitay tashqi ishlar ministirliqining bayanatchisi jang chiyö 7 ‏- iyun küni muxbirlarni kütüwélish yighinida, amérika prézidénti jorj bushning, Uyghur milliy herikitining rehbiri rabiye qadir xanimgha bergen bahasigha qattiq naraziliq bildürdi.

Amérika prézidénti jorj bush 5 ‏- iyun küni, chéx jumhuriyitining pragada shehiride, 17 dölettin kelgen démokratiye wekilliri qatnashqan yighinda söz qilip, Uyghur milliy herikitining rehbiri, meshhur kishilik hoquq pa'aliyetchisi rabiye qadir xanim bilen körüshüp, rabiye qadir xanimning perzentlirining türmige tashlinishi, uning kishilik hoquq pa'aliyitidin öch élishtin ibaret ikenlikini tekitligen idi.

Prézidént bush yene, Uyghur milliy herikitining rehbiri, meshhur kishilik hoquq pa'aliyetchisi rabiye qadir xanimgha " rabiye qadirgha oxshash er- ayallarning talanti öz döletlirining eng zor bayliqi bolup, bu , ularning armiyisining qoral-yaraqliri we yaki yer astidiki né'iftliridinmu qimmetliktur " dep baha bergen idi.

Xitay bayanatchisi jang chiyö " amérika terepning uning heqqidiki söz herikiti, xitayning ichki siyasitige qopalliq bilen arilishish hésablinidu, junggo terep buninggha qarita qattiq naraziliq we qet'iy qarshiliq bildüridu" dédi.

Rabiye qadir xanim, 2005 ‏- yili xitay türmisidin qutulup, amérika tupriqigha qedem basqan künidin étibaren, Uyghur millitining erkinlikini qolgha keltürüsh üchün pa'aliyet élip barmaqta. Nöwette, rabiye qadir xanim amérika we yawrupa elliri teripidin qollashqa érishipla qalmastin, belki " nobél " tinchliq mukapatining küchlük namzati bolush bilen bir waqitta yene Uyghur millitining " meniwi anisi" dégen namlar bilen teriplenmekte. (Eqide)