Рабийә қадир америкиниң уйғур елигә хизмәт өмики әвәтип тәкшүрүш елип беришини тәләп қилди

 Йиғинда хитай даирилирини олимпик бихәтәрликини баһанә қилип, уйғурларни " қәтлиам" елип бериш билән әйиблигән рабийә қадир, хитай сақчилириниң йеқинда үрүмчи"таңнури бағчиси" аилиликләр қоросидики бир өйгә бесип кирип, 5 уйғурни етип ташлиғанлиқи, йәнә 5 уйғурниң қәшқәрдә өлүм җазасиға һөкүм қилинғанлиқини әскәртти.

Бу қетимқи йиғинда рабийә қадир қатарлиқлар билән бир қатарда америка ташқи ишлар министирлиқиниң көчмәнләр ишлириға мәсул муавин ярдәмчи министири кәллй райн испат бәргән. Испат бериш йиғини хитай әлчиханисиниң йиғинда рабийә қадирни сөзләтмәслик һәққидики бесими астида өткүзүлгән.

Дөләт мәҗлиси диний ишлар хизмәт гурупписиниң мәсул хадимлиридин тина ромерезниң ашкарилишичә, йиғиндин бурун вашингтондики хитай әлчиханисиниң бир дипломати униңға телефон қилип, рабийә қадирниң бир "җинайәтчи" икәнликини, уни сөзләтмәсликни тәләп қилған. Лекин тина ромерезниң бәргән җаваби наһайити қәтий болуп, у "рабийә қадир биз үчүн җинайәтчи әмәс... У бизниң нәзиримиздә өз хәлқиниң кишилик һоқуқи вә диний әркинлики үчүн күрәш қиливатқан бир күрәшчи. Әгәр у җинайәтчи дейилсә, силәрниң қануниңларда мәсилә бар, дегәнликтур," дәп тәкитлигән.

Шу күнки йиғинға хитай әлчиханиси өзиниң бир адимини күзәтчиликкә әвәткән болуп, йиғин риясәтчиси хитайниң рабийә қадирға пикири болса, әлчихана хадиминиң рабийә ханимға мушу сорунда соал қоюшини қарши алидиғанлиқини билдүргән. Лекин әлчихана хадими соал соримиған.