Рабийә қадирниң алий мәктәпкә имтиһан беридиған нәвриси сияси интиқамға дуч кәлди

Уйғур кишилик һоқуқ паалийәтчиси рабийә қадирниң бу йил алий мәктәпкә имтиһан беридиған бир қиз нәвриси йеқинда мәктәп даирилири тәрипидин туюқсиз чақиртилип, аилисидә "сиясий җинайәтчи" бар - йоқлиқини испатлайдиған бир җәдивәлни толдуруп келиш вә мәһәллисидики сақчиханидин тамға урғузуп келиш тәләп қилинған.

Вәқәдин хәвәрдар кишиләрниң ашкарилишичә, рабийә қадирниң үрүмчи шәһәрлик 20 - оттура мәктәптә оқуйдиған нәврә қизи дилдар қаһар, буниңдин 3 - 4 күн илгири мәктәп даирилири тәрипидин туюқсиз чақиртилғандин кейин, униңға аилисидә "сиясий җинайәтчи" бар - йоқлиқини испатлайдиған бир парчә җәдивәлни тутқузуп, уни толдуруп келиш вә җәдивәлгә мәһәллисидики сақчиханидин тамға бастуруп келишни тәләп қилған. Рабийә қадир аилисидикиләрниң әскәртишичә, әгәр дилдар қаһар рабийә қадирниң " сиясий мәһбус" икәнликини етирап қилса яки бу җәдивәлни толдурушни рәт қилса, у бу йил алий мәктәпкә кирәлмәслики мүмкин.

Хитай һөкүмити 50 вә 60 - йилларда пуқраларға синипии тәркиви бойичә муамилә қилиш сияситини йолға қоюп, помишчиклар яки бай диһқанларниң пәрзәнтлирини алий мәктәпкә елишни чәклигән иди. Хитай даирилириниң рабийә қадир аилисигә тутқан сияситини тәнқид қилғучилар, бу вәқәни хитай қанунлириға ашкара хилап вә рабийә қадирға қарши елип берилған сиясий интиқам, дәп әйиблимәктә.

Хитай һөкүмити 6 - април күни рабийә қадирниң кичик оғли алим абдуреһимни нәнгуән сақчиханисиға елип берип сорақ қилди. Дилдар қаһардин җәдивәл толдүрүшни тәләп қилиш алим абдуреһимниң сорақ қилиниш вәқәси билән охшаш бир мәзгилгә тоғра кәлгән.