Rabiye qadirning aliy mektepke imtihan béridighan newrisi siyasi intiqamgha duch keldi

• 
  2006-04-11

Uyghur kishilik hoquq pa'aliyetchisi rabiye qadirning bu yil aliy mektepke imtihan béridighan bir qiz newrisi yéqinda mektep da'iriliri teripidin tuyuqsiz chaqirtilip, a'iliside "siyasiy jinayetchi" bar - yoqliqini ispatlaydighan bir jediwelni toldurup kélish we mehellisidiki saqchixanidin tamgha urghuzup kélish telep qilin'ghan.

Weqedin xewerdar kishilerning ashkarilishiche, rabiye qadirning ürümchi sheherlik 20 - ottura mektepte oquydighan newre qizi dildar qahar, buningdin 3 - 4 kün ilgiri mektep da'iriliri teripidin tuyuqsiz chaqirtilghandin kéyin, uninggha a'iliside "siyasiy jinayetchi" bar - yoqliqini ispatlaydighan bir parche jediwelni tutquzup, uni toldurup kélish we jediwelge mehellisidiki saqchixanidin tamgha basturup kélishni telep qilghan. Rabiye qadir a'ilisidikilerning eskertishiche, eger dildar qahar rabiye qadirning " siyasiy mehbus" ikenlikini étirap qilsa yaki bu jediwelni toldurushni ret qilsa, u bu yil aliy mektepke kirelmesliki mümkin.

Xitay hökümiti 50 we 60 - yillarda puqralargha sinipi'i terkiwi boyiche mu'amile qilish siyasitini yolgha qoyup, pomishchiklar yaki bay dihqanlarning perzentlirini aliy mektepke élishni chekligen idi. Xitay da'irilirining rabiye qadir a'ilisige tutqan siyasitini tenqid qilghuchilar, bu weqeni xitay qanunlirigha ashkara xilap we rabiye qadirgha qarshi élip bérilghan siyasiy intiqam, dep eyiblimekte.

Xitay hökümiti 6 - april küni rabiye qadirning kichik oghli alim abduréhimni nen'gu'en saqchixanisigha élip bérip soraq qildi. Dildar qahardin jediwel toldürüshni telep qilish alim abduréhimning soraq qilinish weqesi bilen oxshash bir mezgilge toghra kelgen.