Rabiye qadir xanim xitay hökümitining eyiblishige qayta reddiye berdi

Uyghurlarning ataqliq kishilik hoquq pa'aliyetchisi rabiye qadir xanim charshenbe küni amérikida chiqidighan " memliketke nezer zhornili" ning tor bétida maqale élan qilip, xitay hökümitining özini " térrorist" dep eyiblishige qayta reddiye berdi.

Uyghur aptonum rayonluq partkom sékritari wang léchüen ötken béyjingda bergen axbarat élan qilish yighinida, rabiye qadir xanimni " térrorluq pa'aliyetlerni élip bérishni pilanlidi" dep eyibligen idi.

Emma rabiye qadir xanim in'giliz tiligha terjime qilin'ghan mezkur maqaliside mundaq deydu: " xitay hökümiti méni térrorist dewatidu.... Dunyani özining toqughan sepsetilirige ishendürüsh üchün qattiq uruniwatidu... Xitay hökümiti hetta dalay lamanimu térrorist dep atighan. Ishinimenki, men ular térrorist dep eyibligen axirqi kishi emes" .

Rabiye xanim yene, özining Uyghur élidiki kishilik hoquq weziyitini xelq'aragha ashkarilishidin ensirigen xitay hökümitining axiri uni türmige tashlighanliqini eskertken. U maqaliside yene mundaq dégen:" men xitay hökümiti yash Uyghur anilirining qorsiqidiki hamilisini mejburiy chüshürgende, Uyghur medeniyitige a'it kitablarni köydürgende, shundaqla xitay hökümitige qarshi chiqqan Uyghurlarni " térrorist" dep öltürgende , Uyghurlarning béshigha kelgen bu külpetlerdin qattiq chöchüdüm" .

Rabiye qadir xanim maqalisining axirida, xitay dölet re'isi xu jintawning peyshenbe küni b d t bashliqlar yighinida béridighan nutuqida Uyghurlarning weziyiti heqqide heqqaniy söz qilishqa chaqirdi. (Arzu)