Рабийә қадир, ваң лечүәнниң әйибләшлирини қәтий рәт қилди


2005.08.28

Атағлиқ уйғур паалийәтчиси, уйғурларниң мәниви аниси болған рабийә қадир ханим, хитайниң уйғур аптоном районидики партком секритари ваң лечүәнниң әйибләшлирини қәтий рәт қилип, ваңниң сөзлириниң пүтүнләй төһмәт икәнликини билдүрди.

Рабийә қадир франсийә ахбарат агентлиқиға, ваң лечүәнниң уни, террорлуқ паалийәтлирини орунлаштурушни пиланлиған дәп әйиблишиниң һечқандақ асаси йоқлиқини ейтип, "хитай һөкүмитиниң уйғурларниң кишилик һоқуқини қандақ бастуриватқанлиқини паш қилиш, һәргизму террорчилиқ болмайду" дәп билдүрди.

Рабийә қадир йәнә, хитай һөкүмитиниң мәқситиниң униңға мушундақ қара чаплаш арқилиқ, уни хәлқара җамаитиниң алдида зуван чиқартқузмаслиқ икәнликини билдүрди. Әмма у, хитайниң бу вастилиридин һәргизму қорқуп қалмайдиғанлиқини, өзини уйғур хәлқиниң кишилик һоқуқ давасиға адаққичә ативәткәликини тәкитлиди.

Хитай компартийиси мәркизи комитетиниң сиясий бюро әзаси, уйғур аптоном райониниң партком секритари ваң лечүән, уйғур аптоном райони қурулғанлиқиниң 50 йиллиқи мунасивити билән 25 - авғуст күни бейҗиңда өткүзүлгән ахбарат елан қилиш йиғинида, рабийә қадирни германийидики дуня уйғур қурултийиниң 2 - қетимлиқ йиғинида, бу йәрдики террорчи тәшкилатларниң рәһбәрлири билән бирлишип, аптоном район қурулғанлиқиниң 50 йиллиқи мәзгилидә, террорлуқ паалийәтләрни қандақ орунлаштуруш һәққидә кечичә мәслиһәтләшкән дәп әйиблигән иди. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.