Uyghur élide ayallarning baliyatqu rakigha giriptar bolush nisbiti téz örlimekte

Uyghur aptonum rayonluq ösme késeller doxturxanisining yéqinda ashkarilishiche, Uyghur élidiki ayallarning baliyatqu rakigha giriptar bolush nisbiti yildin- yilgha téz éshiwatqan bolup, bimarlarning köpinchisi 35 yashtin töwen ayallar iken.

Xitay xewer torining doxturxana da'irilirining melumatini neqil keltürishiche, mezkur doxturxanida bu yil dawalan'ghan baliyatqu rakigha giriptar bolghan ayallarning sani 600 din éship, aldinqi yillargha qarighanda körünerlik köp bolghan. Ularning ilgiri sürüshiche, nöwette Uyghur élide baliyatqu rakigha giriptar bolush nisbiti pütün xitay boyiche eng yuqiri bolupla qalmastin, bimarlarning ölüsh nisbitimu eng köp iken.

Doxturxanidiki mutexessisler, baliyatqu raki peyda bolush sewebining baldur toy qilish , baldur baliliq bolush, jinisiy turmushi qalaymiqan bolush qatarliqlar ikenlikini tekitligen. Biraq, ular néme üchün Uyghur élide xitay boyiche, baliyatqu rakigha giriptar bolush we bimarlarning ölüsh nisbitining yuqiriliqini chüshendürmigen.

Uyghur apronum rayonluq ösme késeller doxturxanisining bir doxturi ilgiri radi'oyimiz ziyaritini qubul qilghanda, Uyghur élide baliyatqu rakigha giriptar bolghanlarning ٪ 90 ining jenubiy Uyghur élidiki Uyghur ayalliri ikenlikini hemde buninggha seweb bolghan asasliq amillarning iqtisadiy turmush shara'itining nacharliqi, dawalinish pursitining yoqliqi we mejburiy tughut cheklesh opératsiyiliri qatarliqlar ikenlikini bildürgen idi. (Arzu)