Musulmanlarning mubarek ramizan éyi bashlandi

Islam dinidiki ulugh aylarning biri bolghan ramizan éyi bashlandi. Ramizan éyida rozi tutush musulmanlargha perz qilin'ghan.

Ottura sherq döletliridiki musulmanlar ramizanni seyshenbe küni kütüwaldi. Emma malayshiya qatarliq döletlerdiki musulmanlar bolsa, charshenbe küni yéngi ayni körgendin kéyin ramizan éyigha qedem qoydi.

Dunyaning nurghun jayliridiki musulmanlar hayajan ichide ramizan éyini kütüwalghan bir shara'itta, bir qisim mustebit tüzüm astida yashawatqan musulmanlar ramizanda roza tutushtinmu cheklenmekte.

Muxbirimizning ziyaritini qobul qilghan Uyghur élidiki ismini ashkarilashni xalimighan bir kishining bildürüshiche, xitay hökümiti ramizan harpisida heriket qozghap, musulman ishchi- xizmetchi we oqughuchilarning roza tutushi, namaz oqushini chekligen. Ürümchide hökümet tarmaqliri, ashxana xojayinlirini ramizan mezgilide ashxana taqimasliq heqqidiki toxtamgha qol qoyghuzghan.

Chet'eldiki Uyghur diniy zatliri, xitay hökümitining ramizan éyida Uyghur musulmanlirigha qaratqan bu xil diniy basturushlirini qattiq eyiblimekte. (Arzu)