Xitay ramizan éyida Uyghur élidiki musulmanlargha terewini chekligen

 Yerlik da'irilerning kucha we qeshqerde yüz bergen xitay bixeterlik küchlirige hujum qilish weqeliridin kéyin, ramizan éyida yerlik xelqning téximu zor kölemlik qarshiliqigha uchrashtin ensirep musulmanlarning terewi oqushini chekligenliki ilgiri sürülmekte.

Uyghur élining toqsu nahiyiside nahiyilik hökümet uqturush tarqitip, " dindarlarni chong kölemlik diniy pa'aliyetlerni teshkillimeslik we pilanlimasliqqa agahlandurup turushimiz, ijtima'iy muqimliqqa ziyan salidighan ammiwi pa'aliyetlerning aldini élishimiz kérek" dep tekitligen.

Uqturushta yene kadirlar, partiye ezaliri, oqutquchilar we oqughuchilarning roza tutushi cheklinidighanliqini, kimde ‏ - kim bashqilarni roza tutushqa ündise jazalinidighanliqini agahlandurghan. Shayar nahiyilik hökümet bolsa erlerning saqal - burut qoyushni, ayallarning yaghliq artishini chekligen. Nahiyilik hökümetning bu heqtiki uqturushida " eger saqal - burut qoyghuchilar we yaghliq artquchilar bayqalsa saqal ‏ - burutini chüshürüwétish, yaghliqini alduruwétishke mejburlaymiz " déyilgen.

 Kishilik hoquqni közitish teshkilatining xongkongdiki tetqiqatchisi félim kayn, xitay da'irilirining ramizan éyida musulmanlargha qaratqan yuqiriqi tedbiri " weziyetning kishini qayghugha salidighan ehwalda ikenlikini we basturushning éghirlishiwatqanliqini körsitidu " dep eskertti.