Shinjang renglik métal shirkiti 200 milyon dollarliq pay chékini bazargha salmaqchi

Xitay boyiche 2 - chong nékil ishlepchiqirish karxanisi hésablinidighan shinjang renglik métal guruhi 200 milyon dollarliq pay chékini xongkong aksiye bazirigha sélishni pilanlimaqta.

"Jenubiy junggo etigenlik pochta géziti"ning xewer qilishiche, shinjang renglik métal guruhi kélerki ayda xongkong aksiye bazirigha resmiy iltimas sunup, bu yil 10 - ayning bashliri pay chékini resmiy bazargha sélishi mumkin. Eger ishlar ongushluq bolsa mezkur shirket xitay buyiche 2 - chong nékil ishlepchiqiridighan karxaniliq ornini saqlap qalalaydiken.

Xitayda ishlepchiqirilghan nékilning 5 % ni shinjang renglik métallar guruhi ishlepchiqarmaqta. Shinjang renglik métal guruhi 1950 - yili sabiq sowét ittipaqi bilen hemkarliship qurulghan dölet igilikidiki karxana idi. Nékil polat- tümür sana'étide ishlitilidighan achquchluq matériyal hésablinidu. Yéqinqi künlerde béri nékilning bahasi dunya bazirida téz örleshke bashlighan. Ötken düshenbe küni bir tonna nékil 26 ming 850 dollargha chiqip tarixtiki eng yuqiri rékortni yaratti.

Xitay iqtisadining tereqqiyati polat - tömürge bolghan éhtiyajni köpeytmekte. Közetküchilerning ilgiri sürüshiche, bu nékil bahasining örlep kétishini keltürüp chiqarghan muhim seweb bolup qalghan. Bu ehwallar shinjang renglik métal guruhini zor paydigha érishtürsimu, lékin bu karxanining pay chéki sétishigha qarshi turghuchilar buning yerliklerge payda yetküzüshi natayin, dep qarimaqta. (Erkin)