Уйғур аптоном райони дуняниң әң чоң рәңлик пахта базисиға айланди


2007-07-06
Share

Хитай рәңлик пахта игилики билән шуғуллинидиған монополийә карханилириниң ашкарилишичә, уйғур аптоном райони дуня буйичә рәңлик пахта ишләпчиқиридиған әң чоң базиға айланған болуп, дуня миқясида ишләпчиқириливатқан рәңлик пахтиниң йерими уйғур елидә ишләпчиқирилмақта икән.

Хитай рәңлик пахта чәклик һәссидарлиқ гуруһиниң мудири җав шявлин, өткән һәптә хитайда чақирилған бир хәлқара рәңлик пахта йиғинида, өткәнки он нәччә йилдин бери рәңлик пахтазарлиқларниң көлими 20 һәссә көпийип, нөвәттә уйғур аптоном районидики рәңлик пахтизарлиқлар 130 квадрат километирға йәткәнликини билдүргән.

Мәркизи уйғур аптоном районидики рәңлик пахта һәссидарлиқ чәклик гуруһи, хитайниң әң чоң рәңлик пахта ишләпчиқириш кәспи билән шуғуллинидиған кархана болуп,2006 - йили 8000 тонна рәңлик пахта ишләпчиқарған. Бу шу йили хитай буйичә ишләпчиқирилған рәңлик пахтиниң% 95 ни игиләйду.

"Җуңго" гезити бу һәқтики хәвиридә, мутәхәссисләрниң рәңлик пахтиға муһит билән маслишалайдиған мәһсулат, дәп баһа беришкәнликини язди. Лекин йәнә бәзи мутәхәссисләр, рәңлик яки адәттики пахта игилики районда тупрақниң қумлишиш сүритини тезлитип, бостанлиқларниң йимирилишигә сәвәбчи болуватқанлиқини агаһландурмақта.

Йеқинда уйғур аптоном райони тупрақни қоғдаш идарисиниң башлиқи, тарим дәряси вадисида елип берилған һәддидин зиядә териқчилиқ вә бақмичилиқ ишлири тупрақниң қумлишип кетишини еғирлаштуриватқанлиқини агаһландурди. "Җуңго" гезитиниң хәвиридә әскәртишичә, уйғур елидә һәр йили 100 квадрат километир земинни қум басмақта икән. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт