خىتاينىڭ ساياھەتچىلىك ئىشلىرى گۈللەنگەنسېرى ئۇيغۇرلار ئارقىدا قالماقتا
2006.12.27
رويتېس ئاگېنتلىقىنىڭ خەۋەر قىلىشىچە، ئۇيغۇر ئېلىدىكى بىر قىسىم جايلارنىڭ ساياھەت ئورنىغا ئايلىنىشى بىلەن، خىتاي سودىگەرلىرى پايدا تېپىپ، يەرلىك ئۇيغۇرلارنىڭ تۇرمۇش سەۋىيىسى بارغانسېرى ئارقىدا قېلىشقا باشلىغان.
يېقىندا ئەمما گراھام ئىسىملىق بىر مۇخبىرنىڭ خىتاينىڭ ساياھەتچىلىك ئىشلىرى گۈللەنگەنسېرى ئۇيغۇرلار ئارقىدا قالماقتا دېگەن تېمىدىكى مەلۇماتىدا ئېيتىلىشىچە، تۇرپاننىڭ ئۈزۈم ماكانى تۇيۇق يېزىسىدا يەرلىك ئۇيغۇر مىللىتى بىلەن خىتايلار ئوتتۇرىسىدىكى پەرق ئىنتايىن چوڭ بولۇپ، ۋەزىيەت بىر قەدەر جىددىيلەشكەن. مەسىلەن مەزكۇر يېزىدىكى ئىسمىنى مەلۇم قىلىشنى خالىمىغان بىر ئۇيغۇرنىڭ بىلدۈرۈشىچە، خىتاي سودا شىركەتلىرى ھازىر تۇيۇق يېزىسىنى ساياھەت ئورنىغا ئايلاندۇرىۋالغان. ئۇلار مەزكۇر يېزىنى زىيارەت قىلماقچى بولغانلارغا 30 يۈئەندىن بىلەت سېتىپ نۇرغۇن پايدا ئالغان. لېكىن مەزكۇر يېزىنىڭ ئىگىسى بولغان ئۇيغۇرلارغا ساياھەتچىلەردىن كىرگەن كىرىمدىن بىر تىيىن پايدىسى تەگمىگەن.
مەزكۇر مەلۇماتتا خىتاي مىللىتىنىڭ يىللاردىن بۇيان ئۇيغۇر ئېلىنىڭ نېفىت، گاز ۋە تۈرلۈك يەر ئاستى بايلىقلىرىدىن خالىغانچە بەھرىمان بولىۋاتقانلىقى بايان قىلىنغان.
خوڭكوڭدىكى كىشىلىك ھوقۇق كۆزىتىش تەشكىلاتىنىڭ شىنجاڭ ئىشلىرى مۇتەخەسسىسى نىكولا بېكلىن ئەپەندى خىتاي ھۆكۈمىتىنىڭ ئۇيغۇر ئېلىنى تەرەققىي قىلىمىز دېگەن باھانە بىلەن، ئۇيغۇر ئېلىگە تۈركۈملەپ كۆچمەنلەرنى يۆتكەپ كېلىۋاتقانلىقىنى ھەمدە مەزكۇر جاينىڭ بايلىقىنى بولاڭ -تالاڭ قىلىپلا قالماي ئۇيغۇر مىللىتىنىڭ مەدىنىيىتىنىمۇ بارغانسېرى سۇسلاشتۇرىۋاتقانلىقىنى بىلدۈردى. (مېھرىبان)
مۇناسىۋەتلىك ماقالىلار
- قاناس رايونى ساياھەتچىلەر تەرىپىدىن ۋايرانچىلىققا ئۇچرىماقتا
- خىتاي، ئۇيغۇر ئاپتونوم رايونىدا مۇز تاغ ساياھىتىنى چەكلىدى
- قاناس چەتئەللىك ساياھەتچىلەر بېرىشقا تېگىشلىك جاي دەپ باھالىنىپ، ئالتۇن مۇكاپاتقا ئېرىشتى
- جەنۇبىي "شىنجاڭ" خەلقئارا ساياھەت بايرىمى قەشقەردە باشلاندى
- خىتاي ھۆكۈمىتى قەدىمى يىپەك يولىغا مەبلەغ سالماقچى