Aqsu shayar türmisi topilang yüz bérishidin qattiq endishe qilmaqta

Bash shitabi gérmaniyidiki sherqiy türkistan uchur merkizining bildürüshiche, xitay hökümiti aqsu shayar türmisining 2 - tarmiqida birer topilang yüz bérishidin qattiq endishe qilip, bixeterlik tedbirlirini kücheytken.

Mezkur teshkilatning ashkarilishiche, shaya türmisining 2 - tarmiqidiki türme da'iriliri Uyghur we xitay jinayetchilirige perqliq mu'amile qilghachqa, jinayetchiler arisidiki ziddiyet kücheygen. Türme da'iriliri türmining sighimchanliqi éship ketken nöwettiki shara'itta, xitay jinayetchilirige nisbeten étibar bérip, Uyghur mehbuslirini chetke qaqqan. Bolupmu kamirlargha bölüsh, jaza yéniklitish we maddiy mukapatlarni xitay jinayetchilirigila bergen. Buningdin sirt, xitay jinayetchilirining Uyghur mehbuslirini bozek qilishigha yol qoyghan.

Sherqiy türksitan uchur merkizining éytishiche, bu xil ehwal, Uyghur mehbuslirida qattiq naraziliq keypiyatlarni shekillendürgen. Aqsu wilayetlik alaqidar tarmaqlar we türme da'irilirimu jinayetchiler arisidiki ziddiyettin, birer chong topilang kötürilishidin ensirep, yéqinda barliq türme xizmetchilirining bayramliq dem élishlirini bikar qilghan, shundaqla türmidiki gündipaylar sanini köpeytken.

Aqsu shayar türmiside 1996 - yili 7 - ayning 15 - küni, Uyghur siyasiy mehbusliri bilen saqchilar'otturisida qoralliq toqunush yüz bérip, Uyghur élini zilzilige keltürgen idi. (Arzu)