Nigriponti: xitay shinjang mesilisige oxshash sezgür témilarda pikir almashturushtin qorqmasliqi kérek


2007-10-29
Share

Amérikining mu'awin tashqi ishlar ministiri jon nigriponti ötken hepte amérika - xitay munasiwetler komitétining kechlik ziyapitide söz qilip, xitay da'irilirini "shinjang mesilisi " ge oxshash nazuk témilarda amérika mutexessisliri bilen pikir almashturushtin qorqmasliqqa chaqirdi. U sözide "bu türdiki mesililer biz qiziqidighan mesililer", dep tekitlepla qalmay, u yene"bu türdiki almashturushlarning élip bérilishigha yol qoyush muhim "dep körsetti.

Nigriponti, bu sözlerni amérika - xitay munasiwetler komitétining kechlik ziyapitide bir mutexessisning su'aligha jawab bergende tekitligen bolup, jerriy kohén isimlik bu mutexessis "bizning shinjang weziyiti heqqide maqale yazghan kishilirimiz wiza mesiliside tosalghugha uchrawatidu. Biz bu mesilide ilmiy we kespiy almashturush élip barghanliqimiz üchün tosalghugha uchrimasliqimiz kérek " dep tekitligen hemde amérika tashqi ishlar ministirliqidin bu mesilige diqqet qilishni telep qilghan.

Jon nigriponti, amérika - xitay arisidiki ilmiy almashturush pa'aliyetliride yéqinqi 20 - 30 yildin buyan heqiqiy we emeliy ilgirilesh bolghanliqini, lékin sezgür mesililerde pikir almashturush nahayiti muhim, dep qaraydighanliqini eskertip, " bu yerde men xitay hökümitige shuni eskertimenki, xitay da'iriliri bu türdiki almashturushlardin qorqmasliqi kérek," dep körsetti.

Xewerlerge qarighanda , xitayning amérikidiki elchixanisi Uyghur tetqiqati bilen shughullinidighan bezi mutexessislerge ularning Uyghurlar heqqidiki köz qarishi xitay hökümitining köz qarshi bilen oxshimighanliqi tüpeyli wiza bérishni ret qilghan. (‏Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet