Ш һ т " террорчилиққа" қарши һәмкарлиқни күчәйтидиғанлиқини билдүрди


2005.06.05
Share on WhatsApp
Share on WhatsApp

Шаңхәй һәмкарлиқ тәшкилатиға әза хитай, русийә вә төт оттура асия җумһурийәтлириниң ташқи ишлар министирлири шәнбә күни қазақистанда сөһбәт өткүзүп, " террорчилиққа" қарши һәмкарлиқни техиму күчәйтидиғанлиқини билдүрди.

Америка бирләшмә ахбарат агентлиқиниң хәвиригә қариғанда, улар шаңхәй һәмкарлиқ тәшкилати дөләт рәһбәрлириниң киләр айдики учрушишида имзалиши үчүн, бир қатар һөҗҗәтләрни тәйярлиған. Бу һөҗҗәтләр, һиндистан, иран вә пакистанни " күзәткүчи" салаһийити билән тәшкилатқа қубул қилиш, террорчилиққа қарши бирләшмә һәрикәт елип бериш вә җиддий әһвалларда өз - ара ярдәмлишиш қатарлиқларни өз ичигә алидикән.

Русийә ташқи ишлар министири сергий лавруп йиғиндин кийинки мухбирларни күтивелиш йиғинида, " өзбәкситанда өткән айда йүз бәргән хәлқ қаршилиқ һәрикитидә чечән террористлири вә талибанларниң қоли бар" дәп қайта тәкитләп, " биз һәммимиз радикалларниң дөлитимизгә һоҗум қилишидин сақлинишни халаймиз" дегән.

Бирақ анализчилар, русийә вә хитайниң чечән вә уйғур мустәқилчилирини бастуруш үчүн," террорчилиққа" қарши көрәштин пайдилиниватқанлиқини көрсәтмәктә.

Шаңхәй һәмкарлиқ тәшкилати чегра бихәтәрликини қоғдаш намида қурулғандин буян өз тәсир даирисини кеңәйтишкә урунмақта. Болупму 11 - синтәбир вәқәсидин кийин, хитай вә русийә шаңхәй һәмкарлиқ тәшкилати арқилиқ америкиниң оттура асиядики тәсиригә тақабил турушни истигән.

Нөвәттә шаңхәй һәмкарлиқ тәшкилатиға хитай вә русийидин сирт, қирғизистан, қазақистан, өзбәкистан вә таҗикистанлар әза. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.