6 Neper "shinjangliq" xitay forbés zhurnilining xitaydiki baylar tizimlikige kirdi


2007.11.04

Her yili dunyadiki eng baylarni tizimgha turghuzidighan forbés zhurnili 11- ayning 1- küni xitaydiki eng baylarning tizimlikini élan qilghan bolup, bu tizimliktiki xitay boyiche eng bay töt yüz ademning alte nepiri Uyghur élida béyighan xitaylardur.

Xitayning shinxu'a agéntliqi bu alte neper xitay bayning kimlikini élan qilghan bolup, bular shinjang xelq'ara hessidarliq shirkitining jang yenfu we jyang jéfu isimlik ikki aka-uka xojayini bolup, ular 400 - orun'gha tizilghan.

Qalghan töt nepirining biri 80- yillarda tijaretke kiriship Uyghur aptonom rayonidiki kompartiye we hökümetning qollishigha izchil ériship kelgen shinjang gu'ang xuy hessidarliq - meblegh sélish shirketler guruhining lidéri sun gu'angshin bolup, u, xitaydiki 400 yüz bayning ichide 61-orun'gha tizilghan. U, ötken yili 91- orunni igiligen iken.

Xewerde körsitilishiche bu alte neper xitay bay asasliqi, yer-mülük, qurulush matériyalliri, sayahet, qol téléfon, kanchiliq we soda -sétiq qatarliq saheler boyiche béyighan iken. Melumatlargha qarighanda, sun gu'angshin 80- we 90- yillarning béshida eyni waqitta forbés tizimlikige kirgen rabiye qadir xanim bilen riqabetleshken xitay béyi idi.

Uyghur milliy herikitining rehbiri rabiye qadir xanim bilen xitay béyi sun gu'angshinning teqdiri ikki xil bolup, amérika alimi jamés milliward ependi yéqinda élan qilghan kitabida rabiye qadir bilen sun gu'angshinning teqdirini sélishturup, rabiye qadirning azghina pul bilen tijaret bashlap, öz küchi we talanti bilen ronaq tapqan bolsimu, biraq uning öz millitining menpe'etini közligenliki üchün axiri xitay türmisige tashlinip, alte yil türme azabi tartish hetta perzentlirining türmige chüshüsh teqdirige duchar bolghanliqi, emma xitay béyi sun gu'angshinning bolsa, xitay hökümitining yéshil -chiraqliri astida künsayin béyip, axiri xitay boyiche eng bay ademler tizimlikige kirgenliki, bular arisidiki perqning birining Uyghur, yene birining xitay millitidin bolghanliqini otturigha qoyghan idi.

Amérikidiki bir Uyghur tijaretchisining éytishiche, bu xewer, xitaylarning Uyghur élidiki soda-tijaret pa'aliyetliride mutleq üstünlükni igileydighanliqi, ulargha türlük yéshil chiraqlarning yéqilip, hemme iqtisadiy sahelerni monopol qiliwalghanliqini körsitidu.(Ümidwar)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.