Xitay hökümitining siyasi mehbuslar tizimlikidiki ikki Uyghur

Xitay hökümiti ötken hepte amérika terepke tapshurghan siyasi mehbuslar tizimilikide ikki neper Uyghur siyasi mehbusning barliqi ashkarilandi. Amérikining san - franssisko shehiridiki "söhbet fondi jem'iyiti" ning ashkarilishiche, xitay da'irilirining siyasi mehbuslar tizimlikide Uyghur kishilik hoquq pa'aliyetchisi rabiye qadir bilen muhemmed tash isimlik yene bir siyasi mehbusning isimliki orun alghan.

Bu xitay hökümitining siyasi seweplerdin qolgha élin'ghan Uyghurlarni tunji qétim siyasi mehbus süpitide qobul qilishi bolup hésablinidu. Béyjing hökümiti ötken hepte "söhbet fondi jem'iyiti" arqiliq amérika terepke xitay türmisidiki 56 neper siyasi mehbusning tizimlikini tapshurghan idi.

"Söhbet fondi jem'iyiti" ning ashkarilishiche, muhemmet tash isimlik siyasi mehbus amérika hökümiti yaki "söhbet fondi jem'iyiti" tizimlikide yoq bolup, xitay da'irilirining hazirghiche kishilerge tonulmighan bir Uyghur siyasi mehbusning ismini élan qilghanliqi, "söhbet fondi jem'iyiti" ning qarshi élishigha érishken.

"Söhbet fondi jem'iyiti" ning ashkarlishiche, muhemmed tash 2000 - yili xitay amanliq da'iriliri teripidin qoral -yaraq saqlash "jinayiti" bilen qolgha élinip, 10 yilliq qamaq jazasigha höküm qilin'ghan iken. Tizimliktiki rabiye qadir bolsa amérika hökümiti we dölet mejlisining qoyup bérishni telep qiliwatqan siyasi mehbuslar tizimlikide aldin qatardiki kishi hésablinidu.(Erkin)