Xitay ishliri komitéti amérika dölet mejlisi we bush hökümitige Uyghur siyasiy mehbuslar toghrisida tewsiye berdi

Amérika dölet mejlisining xitay ishliri komitéti ötken hepte élan qilghan 2006 - yilqi doklatida, bush hökümiti we amérika dölet mejlisini xitay türmiside yétiwatqan Uyghur siyasiy mehbuslirining ehwaligha köngül bölüshke chaqirdi.

Doklatta, prézidént we amérika dölet mejlisi xu shigén, jin xeyké, shuy wéy, yang zili qatarliq "türmide awazini chiqiralmaywatqan" xitay siyasiy mehbuslirigha we shu qatarda Uyghur muherrir küresh hüseyin, yazghuchi nurmuhemmet yasin we tarixshunas toxti muzatlar üchün gep qilishi kérek, déyilgen.

Doklatta yene , küresh hüseyinning bir hékayini tehrirlep neshr qilghanliqi, toxti muzatning tarix tetqiqati élip barghanliqi we nurmemet yasinning hékaye yazghanliqi üchün qolgha élin'ghanliqi eskertildi.

Doklatta, Uyghurlarning diniy étiqad erkinliki heqqide toxtilip, "xitay hökümitining Uyghur aptonom rayonida yolgha qoyuwatqan diniy basturush siyasiti Uyghur kimlikini yoqitish herikitining bir qisimi" déyilgen .

Mezkur komitét doklatida bush hökümiti we dölet mejlisi "Uyghurlarning hej pa'aliyitini hökümet arilashmighan ehwalda erkin élip bérishigha xitay hökümitini qayil qilishi kérek" dep tekitligen. Xitay tashqi ishlar ministirliqi düshenbe küni mezkur komitétning doklatini tenqid qildi. (Erkin)