Үрүмчидә диний әрбаплар өгинишкә мәҗбурланмақта


2006.03.23

Хитай һөкүмити диний саһәдикиләрдин сотсиалистик шәрәп ‏- номус қариши тикләшни тәләп қилди. 21 ‏- Март күни үрүмчи шәһиридә ислам, будда, христиан, католик динлириниң мөтивәрлиридин 13 киши сөһбәт йиғиниға чақиритилип, хитай компартийиси баш секретари ху җинтавниң бейҗиңдики икки йиғин җәрянида оттуриға қойған сотсиалистик шәрәп ‏- номус қаришини өгинишкә уюштурулған.

Өгинишкә қатнашқан будда диний җәмийити башлиқи "баш шуҗи ху җинтавниң сотсиалистик шәрәп ‏- номус қариши тоғрисидики нәзирийиси җуңхуа миллитиниң әнәнивий мәдәнийитиниң җәвһири" дәп мәдһийилиди.

Үрүмчи ислам җәмийитиниң муавин башлиқи ма ахун "биз кәң диний мухлислар арисида сотсиалистик шәрәп ‏- номус қариши тикләшниң тәрғибатчилири болимиз" дәп ипадә билдүрди.

Хитай һөкүмити тәшвиқатида диний етиқад әркинликини тәрғип қиливатқан бир пәйттә, диний саһәдикиләргә болған контроллуқини күчәйтип, уларға сотсиализм қаришини зорлаш һәрикәтлирини тохтатмай давамлаштурмақта. (Илтәбир)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.