Шаңхәй содигәрлири қорғас чегрисида базар ачмақчи

• 
  2005-05-12

Хитай һөкүмитиниң қазақистан билән болған сода алақисини күчәйтиш үчүн, уйғур елиниң қорғас чегрисида "хитай- қазақистан қорғас хәлқара чегра шәһәрчиси" қурмақчи болғанлиқи, хитай өлкилиридә қорғас чегра райониға бәс- бәстә мәбләғ селиш қизғинлиқини қозғиди.

Хитай һөкүмитигә қарашлиқ тәңритағ тор бетиниң хәвиридин ашкарилинишичә, йеқинда бир нәччә шаңхәйлик содигәр қорғас чегра еғизида ширкәт ечип, "қорғас хәлқара сода мәркизи" қурушни пиланлиған. Улар бу қурулушқа 80 милйон йүән мәбләғ салмақчи болған.

Ширкәт мәсулиниң билдүрүшичә, бу йил 6 - айда қурулуш башлайдиған " қорғас хәлқара сода мәркизи" дә , сода- сетиқ, көңүл ечиш вә тиҗарәт иш беҗириш орни бирләштүрилидикән. Қурулуш көлими 30 миң квадират метир болуп, 300 дин артуқ дуканни сиғдуралайдикән.

Хитай даирилири хәвиридә, буни, қорғас чегрисини ечиш вә тәрәққий қилдуруш пурсити дәп билдүрмәктә. Әмма нурғун уйғурлар, бу хил тәрәққиятларниң йәниму көп хитай көчмәнлириниң бу раюнға орунлишишиға йол ечип беришидин әндишә қилмақта. (Арзу)