Xitay hökümiti teklimakanni késip ötidighan yene bir tashyol yasimaqchi

Xitay hökümiti kéler yili 5 - aydin bashlap, teklimakan qumluqini bésip ötidighan yene bir yuqiri sür'etlik tashyol yasaydighanliqini bildürdi.

Xitay hökümitining zuwani bolghan shinxu'a agéntliqining xewirige qarighanda, mezkur yuqiri sür'etlik tashyol aqsudiki araldin xoten'ge tutishidighan bolup, omumiy uzunluqi 425 kilométir kélidiken. Mezkur qurulushqa 834 milyon yü'en xirajet we üch yil waqit kétidiken.

Xitay hökümiti 1995 - yili teklimakanni bésip ötidighan tünji yuqiri sür'etlik tashyolini püttürüp, qatnashni bashlighan idi. Xitay da'iriliri bu qétim yasalmaqchi bolghan yuqiri sür'etlik tashyolning teklimakan qumliqigha téximu ichkirilep kirip, Uyghur élining jenubiy rayonlirini téximu yaxshi tutashturidighanliqini bildürgen hemde bu qurulushning tarim oymanliqidiki néfit qédirish ishliri, tarim deryasini échish we Uyghur élining jenubiy rayonlirining iqtisadini tereqqiy qildurushta muhim rol oynaydighanliqini körsetken.

Biraq chet'eldiki bir qisim Uyghur pa'aliyetchiliri, bu yéngi yuqiri sür'etlik tashyol qurulushining, xitay köchmenlirining Uyghur élining chet - yaqilirighiche keng kölemde orunlishishigha we Uyghur élining tebi'iy bayliqining, xitay hökümiti teripidin bulang- talang qilinishigha asanliq yaritip bérishidin endishe qilidighanliqini bildürmekte. (Arzu)