Uyghur élide tamaka chékidighanlarning sani xitay boyiche aldinqi orunda turidiken

31 - May küni 18 - nöwetlik "xelq'ara tamaka tashlash küni" bolup, bu munasiwet bilen élip bérilghan bir tekshürüshke qarighanda, Uyghur élide tamaka chékidighanlarning sani pütün Uyghur éli nopusining 30٪ ini teshkil qilidiken.

Tengritagh xewer torining melum qilishiche, hazir Uyghur élide tamaka chékidighanlarning sani 5 milyon 7 yüzminggha yétidiken. Shundaqla Uyghur élidiki tamaka chékish ehwalining éghirliqi xitay boyiche aldinqi orunda turidiken.

Bir tamaka chekküchining bir ayda tamakigha xejleydighan pulini texminen 104 yu'en dep hésablighanda, Uyghur élidiki 5 milyon 7 yüz ming tamaka chekküchi bir yilda texminen 7 milyard 2 yüz milyon yu'enni tamakigha israp qilidiken.

Uning üstige yéqinqi tekshürüshlerge qarighanda, hazir yash balilar arisida tamaka chékidighanlarning sani téz örlewatqan iken. Sehiye orunlirining melum qilishiche, tamaka, kishilerning ten-salametlikige intayin ziyanliq bolup, qan bésimi yuqiri bolush, di'abit yeni qent siyish késili, tajisiman yürek késili we sekte qatarliq késellerge giriptar bolghuchilarning köpi tamaka chekküchiler iken. (Peride)