Tarim deryasi süyining bulghinishi köp miqdardiki béliqlarning ölüshini keltürüp chiqardi

Uyghur élidiki tarim deryasining süyi éghir derijide bulghinip, bu yerdiki béliqlarning köp miqdarda ölüshini keltürüp chiqarmaqta.

Aqsu wilayetlik muhit tekshürüsh ponkitining chiqarghan doklatida körsitilishiche, bulghinish tarim deryasining alar we ishlepchiqirish qurulush armiye bingtüenining 1‏- déwiziyisidiki éqinida bir qeder éghir bolghan hemde suning süpiti omumyüzlük nacharlap ketken.

Shundaqla deryadiki béliqlar ölüp, hetta béliq yigen bezi kishiler zeherlinip doxturxanilargha kirip qélish ehwalimu körülgen. Munasiwetlik orunlar ölük béliqlarni tekshürgende, ularning terkiwide türlük zeherlik ximiyiwi terkibler bayqalghan. Bu zeherlik terkibler kishilerni aghritip hetta mejroh qilip qoyushimu mumkin iken.

Aqsu wilayetlik su muhitini tekshürüsh merkizining bildürüshiche, ular su bulghinishi bir qeder éghir bolghan tarim deryasi boyidiki xitayning bingtüen 1‏- déwiziyisi etrapida tekshürüsh élip barghan. Netijide bu rayondiki 8 chong étizliqtin chiqqan oghut tipidiki ximiyilik terkibler arilashqan paskina sularning biwaste tarim deryasigha qoyup bérilgenlikini bayqighan. Aqsu wilayitidiki munasiwetlik orunlar hazir yuqiridin bu mesilini hel qilish üchün jiddiy tedbir qollinishni telep qilmaqta.

Tarim deryasi Uyghur élidiki 5 wilayet- oblast, 27 nahiye-sheher hemde bingtüenning 4 déwiziyisi we 55 polikidin ötidu. Shundaqla derya boyidiki ahaliler nopusi 7 milyon 800 ming kishi bolup, bu pütün Uyghur éli nopusining yérimini igileydu. (Peride)