Тарим дәрясида он йилдин буянқи әң еғир су кемийиш көрүлди


2007.09.18

Уйғур ели тарим дәряси башқуруш идарисиниң ашкарлишиға қариғанда , бу йил авғуст тарим дәряси сүйи он йилдин буянқи әң төвән болған бир мәзгил болған болуп , бу дәря вадисидики деһқанчилиқ һәм муһитиға еғир тәсирләр көрсәткән. Шундақла бу йәнә келәр йил әтиязлиқ терилғу ишлирида еғир су йетишмәсликкә сәвәб болуши мумкин икән.

Уйғурчә йәрлик гезитләрниң хәвәрлиридә әскәртилишичә, тарим дәряси сүйиниң кемийиши болупму ақсу дәряси, хотән дәряси вә зәрәпшан дәрясидин ибарәт үч чоң ғол тармақ еқинларда көрүлгән болуп ,бултурқи мушу мәзгилгә селиштурғанда бу дәря еқинлириниң сүйи оттура һесаб билән 2милярд икки йүз милйон 88миң куп летир азайған .

Нөвәттә дәря башқуруш тармақлири , су тосуш , тармақ өстәң ,суни пилансиз ишлитишкә охшаш һәрикәтләргә болған башқурушни күчәйтмигәндә келәр йиллиқ терилғу еғир тәсиргә учрайдиғанлиқини агаһландурған.

Гәрчә хитай ахбаратлирида тарим дәрясида еғир су кәмчиллики көрүлүшниң сәвәблири һәққидә ениқ тохталмиған болсиму , тарим дәря вадисидики уйғур йезилиридин игилишимизгә қариғанда , тарим дәрясида су кемийиш һадисилири хитайниң боз йәр ечишни йолға қойған йеқинқи он йилдин буян барғанчә еғирлишиватқан болуп , тарим дәряси ғол еқинлириниң юқириқи қисимлириға орунлашқан хитай ишләпчиқириш қурулуш армийисиниң деһқанчилиқ мәйданлири дәря сүйини мәхсус тосақлар қуруп су амбарлириға қачилиғандин башқа сансиз тармақ өстәңләрни ечип суни нормисиз ишләткәчкә , төвәнки еқинда яшаватқан йәрлик уйғур деһқанлириниң деһқанчилиқ һәм ичимлик су мәнбәси қис болушини кәлтүрүп чиқармақта икән.

Шундақла тарим дәряси сүйиниң кемийиши билән дәря вадисидики тәбиий орман һәм тоғрақлиқларму барғанчә қуруп чөллишиш , қумлишиштәк екологийә вәйранчилиқ еғирлашмақта. (Гүлчеһрә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.