Җуңго тарим нефитликини дачиңниң орниға дәссәтмәкчи

Хитай, дачиңда нефит ишләпчиқиришниң азийишидин келип чиққан бошлуқни тарим ойманлиқида йеңи нефитлик тепиш билән толдурмақчи икән. Дачиңда нефит ишләпчиқириш 1997- йилдин башлап йилиға 6.2 Пирсәнттин азийишқа башлиған.

21 - Әсир иқтисади хәвәрләр гезитиниң ашкарилишичә, хитайниң җуңго нефит ширкити қатарлиқ 4 чоң нефит гуруһи тарим нефитликини дачиңниң орниға дәсситиш, ташқирида русийә вә қазақистанға нефит турубиси ятқузуп, нефит тошуш линийисиниң бихәтәрликигә капаләтлик қилиш вә африқа, латин америка, оттура шәрқниң нефит мәнбәлиригә мәбләғ селишни күчәйтмәктә.

Җуңгониң әң чоң нефитлики дачиңда нефит ишләпчиқириш 1997 - йилдин бери азийишқа башлиғанлиқини тәкитлигән 21 - әсир иқтисади хәвәрләр гезити, җуңго " бу бошлуқни толдуруш үчүн диққәт нәзирини шинҗаңниң тарим ойманлиқи вә йеқин деңиз районидин йеңи нефитликләрни издәшкә мәркәзләштүрүшкә башлиди"дәйду.

Хитай мәтбуатлириниң илгири сүрүшичә, нөвәттә уйғур аптоном райони хитайни йилиға тәхминән 20 милйон тоннидин артуқ нефит билән тәминлимәктә. Уйғур аптоном райониниң рәиси исмайил тиливалди өткән йили буниң кәлгүси 15 - 20 йил ичидә 100 милйон тонниға йәткүзүлидиғанлиқини вә хитайға керәклик нефитниң 60 % и бу райондин тәминлинидиғанлиқини җакарлиған.

Хитайниң райондики нефит сияситини қоллиғучилар, бу, йәрлик пуқраларға иқтисади мәнпәәт йәткүзиду, дәп әскәртсиму, лекин буни тәнқид қилғучилар бу сиясәт муһитни вәйран қилиш вә хитай көчмәнлирини бир тәрәплимилик мәнпәәтдар қилиш ролини ойнаватиду, дәп әйиблимәктә. (Әркин)