Тарим ойманлиқи чәтәл нефит ширкәтлиригә ечиветилди


2006.07.26

Хитай даирилири йеқинда тарим ойманлиқидики нефит қидириш ишлирини чәтәл ширкәтлиригә қарита ечивәткән. Шундақ болғанда чәтәлдики нефит ширкәтлири тарим ойманлиқиниң 110 миң квадират километир даиридики җайида нефит қидириш ишлирини елип баралайдикән.

Хитай хәвәр агентлиқиниң мәлум қилишичә, хитай даирилириниң бундақ қилишидики мәқсити, чәтәлниң илғар техникилири билән уйғур елидики нефит байлиқини қезиш үнүмини юқири көтүрүш икән. Бу районда нефит қидиришқа қизиққан чәтәл ширкәтлири барлиқ нефит қидириш җәрянидики чиқимларға өзлири мәсул болидикән. Навада нефит тапалиса у чағда пайдини хитай билән бөлүшүп, хитай 51% пайдиға, қалған 49% пайдиға нефитликни тапқан шу чәтәл ширкити еришидикән.

Хәвәрдә көрситилишичә, хитайниң енергийә байлиқи бихәтәрлики саһәсидики мутәхәссислири бу чариниң хитай үчүн пайдилиқ болидиғанлиқини, уйғур елидә көп нефитлик байқалса, у чағда хитайниң чәтәл нефитигә тайинип қелишидин сақланғили болидиғанлиқини билдүргән.

Буниңға қарши қарашта болуватқан уйғур көзәткүчиләр, буниң йәрлик хәлқләргә һечқандақ пайда йәткүзмәйдиғанлиқини, уйғур елиниң енергийә байлиқлириға йәнила хитай һөкүмити вә хитайлар еришиватқанлиқини тәкитлимәктә. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.