Илида мәхсус чәтәлликләргә қаритилған тазилаш һәрикити елип берилди

Или күндилик гезити 21- январ , или областида һөкүмәт һәмдә сақчи даирилири бирликтә , чеградин қанунсиз киргән , рәсмийәтсиз туруватқан һәм қанунсиз ишләватқан йәни чәтәл тили дәрси берип, оқутқучилиқ қиливатқан чәтәлликләргә қарита үч хил қанунсизларни тазилаш һәрикити башлиғанлиқи вә бу җәрянда 19 чәтәлликни қолға алғанлиқи һәққидә хәвәр бәргән иди.

Қолға елинған чәтәлликләрниң дөләт тәвәлики , қайси қанунға хилаплиқ қилғанлиқи вә қандақ бир тәрәп қилинидиғанлиқиға охшаш мунасивәтлик учурларни игиләш мәқситидә , мухбиримиз гүлчеһрәниң телефон арқилиқ или җамаәт хәвпсизлик вә ахбарат даирилиридин игилигән мәлуматлирини деққитиңларға сунимиз.

• Мухбиримиз гүлчеһрәниң бу һәқтики толуқ мәлумати
• Download story audio

Чәтәлликләргә қатму ‏- қат қапқан қуруш

Или областиниң һөкүмәт торида 22- январ берилгән хәвәрдин ениқлинишичә, йеңи йил киришниң алдида йәни бир ай бурун ,или областлиқ һөкүмәт вә сақчи даирилири 2008- йиллиқ олимпикниң мувәппәқийәтлик өткүзүлүшигә капаләтлик қилиш үчүн " үч хил қанунсиз чәтәлликләрни тазилаш " намида кәң көләмлик һәрикәт башлиған .

Бу җәрянда һөкүмәт асаслиқ или области буйичә барлиқ мәһәллә ‏- комитет , олтурақ районлар вә асасий қатламдики сақчи вә кадирларни ишқа селип , сиясий мәқсәтлик һәрикәт елип бериш үчүн или тәвәсигә йошурун киргән чәтәлликләрни , меһманхана, қонақ һәтта өйму ‏- өй тәкшүрүп , сақчи орунлириға тизимға алдурмай яшаватқан , той қилип туруватқан,рухсәтсиз дәрс өтүватқан чәтәлликләрни қатму ‏- қат тосақлар билән ахтуруп тазилаш елип бериватқан болуп ,һазирғичә бу мәхсус чәтәлликләргә қаритилған "үчни тазилаш" һәрикити үчүн мәхсус 260 адәм күчини ишқа салған.

Гәрчә или күндилик гезити вә или хәвәр торида берилгән хәвәрләрдә или сақчи даирилири тәрипидин қолға елинған 19 нәпәр чәтәлликниң иккисиниң қанунсиз дәрс өткәнлики йәнә 17 синиң болса қанунсиз туруватқанлиқи сәвәблик қолға елинип бир тәрәп қилишни күтүватқанлиқи тәкитләнгән болсиму , әмма бу чәтәлликләрниң дөләт тәвәлики қатарлиқ муһим учурлар берилмигән. Биз бу һәқтә йәниму тәпсилий хәвәр игиләш үчүн или областлиқ җамаәт хәвпсизлик идариси һәмдә ташқи ишлар бөлүмигә телефон қилип сориғинимизда даириләр бирдәк чәтәлликләрни қолға елиш вәқәсини инкар қилди:

Или области сақчи башлиқи ":чәтәлликләрни қолға елиш қанунға хилап"...

Биз йәнә или областлиқ җамаәт хәвпсизлик идариси башлиқи рәһим билән алақилаштуқ, у мәзкур хәвәрни алаһидә һаяҗан билән инкар қилғандин башқа , чәтәлликләрни қолға елиш қанунсизлиқ дәп билдүрди.

Чәтәллик оқутқучиларни тазилаш һәрикити?

Или күндилик гезитидә берилгән мәзкур хәвәр или областлиқ сақчи даирилири тәрипидин инкар қилинғандин кейин, биз мәзкур ахбаратни елан қилған ,хитай партийә ‏- һөкүмәт даирилири башқурушидики ахбарат оргини болған или күндилик гезити тәһрир бөлүми билән алақилаштуқ: ‏-яхшиму сиз ? или күндилик гезитиму? ‏-шундақ ? немә ишиңиз бар? ‏-мән әркин асия радиоси мухбири , гезитңларда берилгән 19 чәтәлликниң тутулғанлиқ хәвири һәққидә тәпсилий мәлумат алай дегәнтим. ‏- Һә сиз һелиқи чәтәллик оқутқучиларни тазилашни дәмсиз? ‏- һә шундақ. ‏- Бу чәтәлликләрниң дөләт тәвәлики һәм қандақ бир тәрәп қилинғанлиқини ейтип бәргән болсиңиз? ‏- бу һәқтә бизму толуқ учурға игә әмәс. ‏- Бу хәвәр ишәнчиликму? ‏- әлвәттә ишәнчилик, бу ахбаратни биз или областлиқ қанун даирилири һәмдә ташқи ишлар бөлүминиң тәстиқини елип тамға бастурғандин кейин елан қилған . Йүздә ‏- йүз ишәнчилик , әмма башқа тәпсилий әһвалларни билмәйдикәнмән.

Дилшат ришит "юшурушниң өзи вәзийәтниң җиддийликини ашкарилайду"

Дуня уйғур қурултийи баянатчиси дилшат ришит илида башланған үчни тазилаш һәрикитини , "хитай һөкүмитиниң 2008- олимпик алди кәйнидә , чәтәлниң вә чәтәл мухбирлириниң или вәқәси һәм уйғурларниң кишилик һәқ ‏- һоқуқлириниң дәпсәндә қилиниш әмәлий әһваллирини игилиши вә униң дуня мәтбуатида ашкарилинип қелишниң алдини елиш мәқсидә елип бериватқан ахбаратни қамал қилиш һәрикити" дәп билдүрди.