Xitay hökümiti Uyghur élide metbu'at saheside tazilash herikitini bashlidi

Xitay hökümiti Uyghur élide "sériq" we "qanunsiz" neshriyat buyumlirigha zerbe bérish herikitini bashlidi.

Uyghur aptonum rayonluq partkomning mu'awin sékritari nur bekri charshenbe küni " bölgünchilikke qarshi turush" we " singip kirishke qarshi turush" ningmu bu yilqi "sériq" we "qanunsiz" neshriyat boyumlirini tazilash herikitining muhim terkibi ikenlikini bildürgen.

Xitay hökümitige qarashliq xitay xewer torining bildürüshiche, Uyghur éligha chet'elning "qanunsiz" metbu'atliri köplep kiridiken. Ötken yili xitay hökümiti Uyghur élide élip barghan tazilash herikiti jeryanida jem'iy 430 ming parchidin artuq neshriyat boyumlirini musadire qilghan.

Emma chet'eldiki bir qisim pa'aliyetchiler xitay hökümitining "sériq" we "qanunsiz" neshriyat boyumlirigha zerbe bérish namida, hökümet xalimaydighan bir qisim diniy, tarixiy we siyasiy kitab- zhornal , ün'alghu we sin'alghu léntilirini musadire qiliwatqanliqini bildürmekte.

Uyghur élidin kelgen inkaslargha qarighanda, Uyghur élide hetta shotlandiye milliy azatliq inqilabini téma qilghan "jesur yürek" namliq kino filimimu cheklen'gen.

Xitay xewer torining éytishiche, xitay da'iriliri bu yilqi "sériq"we "qanunsiz"neshriyat buyumlirigha zerbe bérish herikitide intérnét tor betliri we torxanilarnimu tazilash obyékti qilidiken. (Arzu)