باي ناھىيىسىدە يەنە بىر چوڭ تەبىئىي گاز زاپىسى بايقالدى

شىنخۇا ئاگېنتلىقىنىڭ 10 ‏-ئۆكتەبىر خەۋەر قىلىشىچە، خىتاينىڭ تارىم نېفىت شىركىتى، ئاقسۇ ۋىلايىتىنىڭ باي ناھىيىسىدە ، زاپاس مىقدارى 130 مىليارد كۈپ مېتىر كېلىدىغان بىر تەبىئىي گاز كانىنى بايقىغان. مەزكۇر كاننىڭ كۈنلۈك مەھسۇلات مىقدارى 286 مىڭ كۈپ مېتىر ئەتراپىدا تەخمىن قىلىنغان.

ئەگەر بۇ تەخمىن توغرا چىقسا، بۇ كان ئۇيغۇر رايونىدىكى زاپاس مىقدارى 100 مىليارد كۈپ مېتىردىن ئاشىدىغان ئۇچ چوڭ تەبىئىي گاز كانىدىن بىر بولۇپ قالىدۇ ؛ قالغان ئىككىسى بولسا ئاقسۇنىڭ باي ناھىسىدىكى قارا 2 ۋە كۇچا ناھىيىسىدىكى دىنا 2 دەپ ئاتىلىدىغان تەبىئىي گاز كانلىرىدۇر.

خەۋەردە كۆرسىتىلگەن ئۇچۇرلارغا ئاساسلانغاندا، ئۇيغۇر رايونىدىكى تەبىئىي گاز ۋە نېفىت زاپاس مىقدارى خىتاينىڭ ئومۇمى قۇرۇقلۇقنى بازا قىلغان ئومۇمى نېفىت ۋە تەبىئىي گاز زاپاس مىقدارىنىڭ % 25 نى تەشكىل قىلىدۇ. بۇلتۇر ئۇيغۇر رايونىدىن ئىشلەپچىقىرىلغان نېفىت مىقدارى 24 مىليون توننا بولۇپ ، خىتاي بۇيىچە 3 ‏-ئورۇندا تۇرغان ؛ تەبىئىي گاز مەھسۇلات مىقدارى بولسا، خىتاي بۇيىچە بىرىنچى ئورۇندا تۇرماقتا.