Ili qazaq oblasti qurulghanliqining 50 yilliqi tebriklendi

Uyghur aptonom rayonining ghulja shehiride ili qazaq aptonom oblasti qurulghanliqining 50 yilliqi yekshenbe küni dagh - dughiliq murasimlar bilen tebriklendi.

Xitay xelq qurultiyi, xitay dölet kabinéti télégramma ewetip, qazaq oblasti qurulghanliqining 50 yilliqini tebrikligen. Ili qazaq aptonom oblasti 1954 - yili Uyghurlargha aptonom hoquqi bérilishtin bir yil burun qurulghan idi . Ili , xitaydiki eng chong aptonom oblastlarning biri. Uyghur aptonom rayonining iqtisadi jan tomurimu, ili qazaq aptonom oblastining qarmiqidiki rayonlargha tarqalghan.

Ili qazaq oblastining omumi yer meydani 350 ming kwadrat kilométir bolup, xitay metbu'atliri nopusining 4 milyon 80 minggha yétidighanliqini ilgiri sürmekte. Xitay da'iriliri, ili qazaq oblasti qurulghanliqini 50 yilliqini xatirilesh munasiwiti bilen ili oblastining merkizi ghuljigha xen sulalisi riwayetliridiki "melike shijün we melike jiyülerning xen jemeti qesri" ni berpa qilip , 50 milyon yüen xejligen. Ili qazaq oblasti qurulghanliqining 50 yilliqini dagh - dugha bilen xatirilesh pa'aliyiti Uyghurlarni heyran qaldurmaqta.

Chünki bir yilning aldida Uyghur aptonom rayoni partkomining sékrétari wang léchüen , 2004 we 2005 - yilliri Uyghur aptonom rayoni boyiche keng -kölemdiki tebriklesh pa'aliyetlirining élip bérilmaydighanliqini jakarlighan idi . Eyni chaghda u buning sewebini israpchiliqning aldini élish dep chüshendürgen . Tebriklesh pa'aliyetliri ötküzilmeydighan 2005 - yil, Uyghur aptonom rayoni qurulghanliqigha del 50 yil tolidighan yildur. Uyghur aptonom rayoni 1955 - yili qurulghan , 1985 - yili Uyghur aptonom rayoni qurulghanliqining 30 yilliqi dagh - dugha bilen tebriklen'gen idi . (Erkin)