Тәҗрибә оттуриниң бир оқуғучиси хәтәрлик маддиларни сақлиғанлиқи үчүн сүрүштүрүлгән


2005.04.25

Мәркизи германийидики шәрқий түркистан учур мәркизи, үрүмчи тәҗрибә оттура мәктәп толуқ оттура биринчи йиллиқтики йүсүп абдусәмәтниң мәктәп тәҗрибиханисидики әсваплардин пайдилинип партлатқуч буюми ясиғанлиқи үчүн қолға елинғанлиқини хәвәр қилди.

Учур мәркизиниң ашкарилишичә, қораллиқ сақчилар мәктәп қорусини қоршивалған шундақла йүсүп абдусәмәтниң ятиқини ахтурған. Шәрқий түркистан учур мәркизи, йүсүп абдусәмәтниң партлатқуч буюмни ятиқида сақлиғанлиқи билдүрди. Учур мәркизиниң тәкитлишичә, йүсүп абдусәмәтниң һәрикитини ятиқидики оқуғучилар паш қилип қойған.

Әмма тәҗрибә оттура мәктәпниң мудири, абдусәмәтниң партлатқуч буюми ясиғанлиқини шундақла қолға елинғанлиқини рәт қилди. Вәқәгә сақчилар арлашмиғанлиқини тәкитлигән мәктәп мудири турди, мәктәп қорусиниң сақчилар тәрипидин қоршивелинғанлиқини шундақла йүсүпниң ятиқи ахтурулғанлиқини инкар қилди. Мәктәп мудириниң ашкарилишичә, йүсүп абдусәмәт "мәктәп тәҗрибиханисидики хәтәрлик химийилик маддиларни ятиқида сақлиған." У, йүсүп абдусәмәтниң " солфат кислатиси" сақлиғанлиқини билдүрди.

Мәктәп мудириниң чүшәндүрүшичә, вәқә уқушмаслиқтин келип чиққан " сиясийлиқи йоқ адәттики интизам мәсилиси" икән. Йүсүп абдусәмәт маралбешилиқ оқуғучи болуп, тәҗрибә оттурида йетип - қопуп оқуйттикән.

Шәрқий түркистан учур мәркизиниң ашкарилишичә, йүсүп абдусәмәт қолға елинғандин кейин униң маралбешидики ата - аниси үрүмчигә кәлгән. Әмма тәҗрибә оттура мәктәпниң мудири, оқуғучиниң ата - аниси оғлиға хизмәт ишләш үчүн кәлгәнликини билдүрди.(Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.