Xitay hökümiti, ürümchidiki ishchilarni qullar emgikige sélish bilen eyiblen'gen xumdanni tekshürdi

Da'iriler, Uyghur aptonom rayonining merkizi ürümchining enenchüy yézisidiki ishchilarni qullar emgikige sélish bilen eyiblen'gen bir xumdanni tekshürgen.

"Jonggo yashlar géziti" ning xewer qilishiche, enenchüydiki mezkur xumdanda ishchilar künde 20 sa'et ishleshke mejburlan'ghan, ish heqqi waqtida bérilmigenning üstige ishchilarning xumdan sirtigha chiqishi cheklen'gen. Tamaq süpiti nachar bolup, yaxshi ishlimigenler tayaq yeydiken. Yéqinda mezkur xumdandiki bir ishchi bu yerdin qéchip chiqip ehwalni alaqidar da'irilerge melum qilghandin kéyin, da'iriler xumdanni tekshürüshke barghan, emma xumdanda héchkim qalmighan. "Jonggo yashlar géziti" weqeni qullar emgiki, dep eyiplidi.

Biraq közetküchiler, enenchüydiki xumdanda ishchilar 20 sa'et ishleshke mejburlan'ghan bolsimu ma'ash bérishke wede qilin'ghan, nachar bolsimu yimek - ichmeki bar. Emma hashargha séliniwatqan Uyghur déhqanlar emgek qorallirini, yimek - ichmek we yol xirajitini özi kötürüp, heqsiz ishleshke mejburlanmaqta, dep körsetti.

Hazir qeshqer qatarliq jaylarda déhqanlar hashargha sélinmaqta. Qeshqer xan'ériq yézisidiki yéza kadiri emetning tekitlishiche, déhqanlar özi mangidighan yolni özi yasishi, özi ötidighan köwrükni özi qurushi kérekken. (Erkin)