Xitay baj idarisi "eqide shirkiti" ni tekshürdi

Uyghur aptonom rayoni partkomining sékritari wang léchü'en, Uyghur démokratiye we kishilik hoquq herikitining rehbiri rabiye qadirni térrorchilar bilen til biriktürüsh we baj oghrilash bilen tenqidligendin kéyin, ürümchi sheherlik baj idarisining xadimliri bilen aptonom rayonluq jama'et xewpsizlik nazaritining xadimliri düshenbe küni rabiye qadirning "eqide soda shirketler guruhi" gha kélip tekshürüsh élip bérishni telep qilghan.

Eqide soda shirkitidikiler, saqchilar we bajxana xadimlirining düshenbe küni baj tekshürimiz, dep kelgenlikini étirap qildi. Emma saqchilar we baj xadimliri shirket dériktori alimni tapalmighandin kéyin qaytip ketken bolushi mumkin.

"Eqide soda shirketler guruhi" ning baj kötigi we pütün matiryalliri buningdin ikki ay ilgiri jama'et xewpsizlik nazariti teripidin musadire qilin'ghan idi. Rabiye qadirning eskertishiche, shirket ilgiri töligen bajni hésablash we buningdin kéyin baj resmiyiti béjirish tosalghugha uchrighan.

Wang léchü'en, béyjingda muxbirlargha rabiye qadirning 1994 - yildin 2004 - yilghiche 7 milyon 180 ming yü'en baj oghurlighanliqini ilgiri sürgen.

"Eqide soda shirketler guruhi" ning qanuni hoquqi rabiye qadir 1999 - yili qolgha élinishtin burun oghullirigha ötküzüp bérilgen bolup, u 1999 - yili qolgha élin'ghiche bolghan jeryanda 16 qétim aptonom rayon boyiche " baj tapshurush bayraqdari," dégen namgha érishken idi. (Erkin)