Uyghur kishilik hoquq dewasini qollighuchilar amérikidin Uyghurlargha köngül bölüshni telep qildi


2005.05.08

Fransiye axbarat agéntliqining yekshenbe küni élan qilghan bir parche maqalisidin melum bolushiche, amérika qatarliq gherb döletliridiki Uyghur kishilik hoquq dewasini qollighuchilar amérika hökümitining Uyghurlargha téximu köngül bölüshini telep qilmaqta.

Ötken hepte amérika dölet mejlisidiki bir ispat bérish yighinida söz qilghan dölet mejlisi ezasi dana roxrabachér "Uyghurlarning kürishi, pilanitimizdiki tipik erkinlik kürishining biri" dep bildürgen hemde amérika hökümitini Uyghurlargha téximu köngül bölüshke chaqirghan.

Emdila xitay türmisidin chiqqan, dangliq Uyghur kishilik hoquq pa'aliyetchisi rabiye qadir xanimmu amérika hökümitining Uyghurlargha éniq bir siyaset belgilishining, Uyghurlarning kishilik hoquq weziyitini yaxshilashqa paydiliq ikenlikini tekitligen.

Maqalide éytilishiche, Uyghur dewasini qollaydighan gherbtiki zatlar nöwette amérika hökümitini xelq'ara térrorchiliqqa qarshi turush éhtiyajini nezerde tutup, Uyghurlarning kishilik hoquqini yaxshilashta yiterlik tirishchanliq körsetmidi dep qaraydiken.

Emma, amérika hökümet da'iriliri özlirining Uyghur mesilisige sel qarawatqanliqini inkar qilip, özlirining xitay hökümitige "térrrochiliqqa qarshi küresh" tin paydilinip, Uyghurlarni basturmasliq heqqide qattiq agahlandurup kéliwatqanliqini bildürgen.

Maqalide körsitilishiche, amérika dölet mejlisi kishilik hoquq komitétining re'isi tom lentismu washin'gtonning Uyghur élidiki kishilik hoquq depsendichiliklirige biperwaliq qiliwatqanliqini ret qilghan. Biraq u amérikining kishilik hoquq siyasiti bilen bixeterlik endishliri otturisida heqiqeten tengpungsizliq barliqini étirap qilip, amérika da'irilirining bu mesilini hel qilish üchün tirishiwatqanliqini bildürgen. (Arzu)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.