Шинҗаң һәрбий райони тунҗи түркүм хитай уйғуртили тәрҗиманлирини йетиштүрүп чиқти

Шинҗаң һәрбий райони йеқинда тунҗи түркүмдики уйғур тили хадимлирини йетиштүрди. Хитай хәвәр агентлиқиниң мәлум қилишичә, шинҗаң һәрбий райониниң мәлум бир чегра қоғдаш кадирлирини тәрбийләш әтиритидә 20 нәпәр хитай мәхсус уйғурчә тәрҗиманлиқ кәспидә толуқ курслуқ унванини елип чиққан. Улар 6‏- айниң ахиридин башлап, уйғур елидики һәр қайси һәрбий қисимлирида хизмәткә орунлишидикән.

Шинҗаң һәрбий райониниң уйғурчә тәрҗиманлиқ кәспий дәсләп 1962‏- йили башланған иди. Лекин 2002‏- йилиға кәлгәндә бу кәсп 4 йиллиқ толуқ курс кәспий қилип бекитилди. 2002‏- Йили оқушқа киргән тунҗи түркүмдики 20 нәпәр толуқ курус оқуғучилири уйғур тилини асас қилип билим алған. Шундақла бу җәрянда улар уйғур елиниң чәт-яқа җайлиридики деһқанларниң өйлиридә бир мәзгил биргә яшап, турмуш сөзлирини өгәнгән. Бундақ қилиштики мәқсәт бу хитай оқуғучиларға уйғурларниң турмуштики вә һәр қайси шивиләрдики тәләппузлирини толуқ игилитиш икән.

Хәвәрдә мәлум болушичә, оқуш пүттүргән бу оқуғучилар уйғур тилини пухта билипла қалмай, аз дегәндә 3 тин көп аз санлиқ милләт тилини сөзлийәләйдикән. Шинҗаң һәрбий райониниң бу тәрбийләш әтритидә йәнә, қазақ тили, қирғиз тили вә рус тили қатарлиқ он нәччә аз санлиқ милләт тили вә дөләт тили кәсплири бар икән.

Шинҗаң һәрбий районида бурундин тартип хели көп түркүмдә уйғур тәрҗиманлири бар иди. Әмма һәрбий район һазир, мәхсус хитайлардин уйғурчә тәрҗиманлирини йетиштүрүшкә тиришмақта. (Пәридә)