Shinjang herbiy rayoni tunji türküm xitay Uyghurtili terjimanlirini yétishtürüp chiqti

Shinjang herbiy rayoni yéqinda tunji türkümdiki Uyghur tili xadimlirini yétishtürdi. Xitay xewer agéntliqining melum qilishiche, shinjang herbiy rayonining melum bir chégra qoghdash kadirlirini terbiylesh etiritide 20 neper xitay mexsus Uyghurche terjimanliq kespide toluq kursluq unwanini élip chiqqan. Ular 6‏- ayning axiridin bashlap, Uyghur élidiki her qaysi herbiy qisimlirida xizmetke orunlishidiken.

Shinjang herbiy rayonining Uyghurche terjimanliq kespiy deslep 1962‏- yili bashlan'ghan idi. Lékin 2002‏- yiligha kelgende bu kesp 4 yilliq toluq kurs kespiy qilip békitildi. 2002‏- Yili oqushqa kirgen tunji türkümdiki 20 neper toluq kurus oqughuchiliri Uyghur tilini asas qilip bilim alghan. Shundaqla bu jeryanda ular Uyghur élining chet-yaqa jayliridiki déhqanlarning öyliride bir mezgil birge yashap, turmush sözlirini ögen'gen. Bundaq qilishtiki meqset bu xitay oqughuchilargha Uyghurlarning turmushtiki we her qaysi shiwilerdiki teleppuzlirini toluq igilitish iken.

Xewerde melum bolushiche, oqush püttürgen bu oqughuchilar Uyghur tilini puxta bilipla qalmay, az dégende 3 tin köp az sanliq millet tilini sözliyeleydiken. Shinjang herbiy rayonining bu terbiylesh etritide yene, qazaq tili, qirghiz tili we rus tili qatarliq on nechche az sanliq millet tili we dölet tili kespliri bar iken.

Shinjang herbiy rayonida burundin tartip xéli köp türkümde Uyghur terjimanliri bar idi. Emma herbiy rayon hazir, mexsus xitaylardin Uyghurche terjimanlirini yétishtürüshke tirishmaqta. (Peride)