Хитай даирилири уйғур елидин 41 тонна партлатқуч буюми қолға чүшүргәнликини билдүрмәктә


2006.08.31
Share on WhatsApp
Share on WhatsApp

Хоңкоңда чиқидиған "дагоң бав" гезити, аптонум районлуқ җамаәт хәвпсизлик министирлиқи хадиминиң сөзини нәқил кәлтүрүп, террорчиларниң һәр хил партлатқуч буюмлири топлап, тәбии газ турба йоли, су електир истансиси, таш йол вә төмүр йолларға һуҗум қилишни пилан қиливатқанлиқини елан қилди. Хәвәрдә йәнә 1990 ‏- йилидин бүгүнгә қәдәр җамаәт хәвпсизлик органлириниң террорчилардин 41 тоннидин артуқ партлатқуч дорини қолға чүшүргәнлики билдүрүлгән.

Бу арида ройетрс агентлиқи, шаңхәй һәмкарлиқ тәшкилатиға әза дөләт мәсуллириниң келәр ай бир ариға җәм болуп, асаслиқ радикал диний күчләр, бөлгүнчиләр вә террорчиларға қандақ зәрбә бериш һәққидә музакирә елип баридиғанлиқини тәкитлиди.

Хәвәрләрдин мәлум болишичә, аптонум районлуқ җамаәт хәвпсизлик министирлиқи йеқинда, район бойичә партлатқуч буюмларға қарита бихәтәрликни күчәйтиш телевизийә - телефун йиғини чақирған. Йиғинда чегра ичи - сиртидики дүшмән күчләрниң тәбии газ турбиси, су електир, таш йол вә төмүр йолларни партилтиштәк террорлуқ һуҗуми елип беришни нишан қилип кәлгәнлики, барлиқ җамаәт хәвпсизлик органлириниң ортақ тиришчанлиқ көрситиши нәтиҗисидә партилтиш делолириниң бир қәдәр азайғанлиқи оттуриға қоюлған.

Аптонум районлуқ җамаәт хәвпсизлик министирлиқи, бу йил 7 ‏- айдин башлап қанунсиз партлатқуч буюмлирини паш қилиш һәркити елип берип, партлатқуч буюмлири ясашқа зәрбә бериш һәриктини җидди қанат яйдурушқа башлиған.

Җоңгу даирилири йәнә, шаңхәй һәмкарлиқ тәшкилатиниң күнлүки астида шәрқий түркистан террорчилириға қаратқан зәрбисини күчәйтишни әң муһим хизмәт нуқтиси қилип бекиткән.

Амма, уйғурларниң кишилик һоқуқи вә әркинликини қолға кәлтүрүш йолида паалийәт елип бериватқан тәшкилатлар, уйғурларниң һечқачан террорлуқ һәрикәтлири билән шуғулланмиғанлиқини тәкитлимәктә. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.