Xitay da'iriliri Uyghur élidin 41 tonna partlatquch buyumi qolgha chüshürgenlikini bildürmekte

Xongkongda chiqidighan "dagong baw" géziti, aptonum rayonluq jama'et xewpsizlik ministirliqi xadimining sözini neqil keltürüp, térrorchilarning her xil partlatquch buyumliri toplap, tebi'i gaz turba yoli, su éléktir istansisi, tash yol we tömür yollargha hujum qilishni pilan qiliwatqanliqini élan qildi. Xewerde yene 1990 ‏- yilidin bügün'ge qeder jama'et xewpsizlik organlirining térrorchilardin 41 tonnidin artuq partlatquch dorini qolgha chüshürgenliki bildürülgen.

Bu arida royétrs agéntliqi, shangxey hemkarliq teshkilatigha eza dölet mes'ullirining kéler ay bir arigha jem bolup, asasliq radikal diniy küchler, bölgünchiler we térrorchilargha qandaq zerbe bérish heqqide muzakire élip baridighanliqini tekitlidi.

Xewerlerdin melum bolishiche, aptonum rayonluq jama'et xewpsizlik ministirliqi yéqinda, rayon boyiche partlatquch buyumlargha qarita bixeterlikni kücheytish téléwiziye - téléfun yighini chaqirghan. Yighinda chégra ichi - sirtidiki düshmen küchlerning tebi'i gaz turbisi, su éléktir, tash yol we tömür yollarni partiltishtek térrorluq hujumi élip bérishni nishan qilip kelgenliki, barliq jama'et xewpsizlik organlirining ortaq tirishchanliq körsitishi netijiside partiltish délolirining bir qeder azayghanliqi otturigha qoyulghan.

Aptonum rayonluq jama'et xewpsizlik ministirliqi, bu yil 7 ‏- aydin bashlap qanunsiz partlatquch buyumlirini pash qilish herkiti élip bérip, partlatquch buyumliri yasashqa zerbe bérish heriktini jiddi qanat yaydurushqa bashlighan.

Jonggu da'iriliri yene, shangxey hemkarliq teshkilatining künlüki astida sherqiy türkistan térrorchilirigha qaratqan zerbisini kücheytishni eng muhim xizmet nuqtisi qilip békitken.

Amma, Uyghurlarning kishilik hoquqi we erkinlikini qolgha keltürüsh yolida pa'aliyet élip bériwatqan teshkilatlar, Uyghurlarning héchqachan térrorluq heriketliri bilen shughullanmighanliqini tekitlimekte. (Eqide)