Хитай һөкүмити 18 нәпәр шәрқи түркистан террорчисини өлтүргәнликини җакарлиди


2007.01.08
Share on WhatsApp
Share on WhatsApp

Хитай хәвпсизлик даирилири, җүмә күни уйғур елиниң пакистан чегриси йеқинидики тағлиқ районда шәрқий түркистан исламий һәрикитиниң лагириға һуҗум қилип, 18 террор гумандарини өлтүрүп, 17 кишини тутқанлиқини билдүрди. Уйғур елидики җамаәт хәвпсизлик назаритиниң назири суң хуңли, һуҗум җәрянида йүз бәргән тоқунушта бир хитай сақчиси өлгәнликини вә бир сақчиниң яриланғанлиқини билдүрди. Униң ейтишичә, сақчилар 22 данә гранат вә 1500 данә қураштурулмиған гранатни қолға чүшүргән һәмдә һуҗумда қечип кәткән террор гумандарлирини тутуш үчүн районда җиддий һәрикәт башлатқан. Лекин улар һуҗум җәрянида қанчә кишиниң қечип кәткәнлики һәққидә бирнемә демигән.

Хәвпсизлик назаритиниң башлиқи, вәқәниң ениқ қайси йәрдә йүз бәргәнлики һәққидә мәлумат бәрмигән. Әмма радиомизниң игилишичә, мәзкур вәқә ақту наһийисиниң косрап йезисида йүз бәргән.

Хитай һөкүмити узундин бери, уйғур елидә уйғурларниң қораллиқ бөлгүнчилик һәрикити елип бериватқанлиқини баян қилип кәлмәктә. Лекин хәлқара кишилик һоқуқ тәшкилатлири һәмдә чәтәлләрдә паалийәт елип бериватқан уйғур тәшкилатлири хитай һөкүмитиниң террорчилиққа қарши уруштин пайдилинип, өзлириниң миллий кимликини вә мәдәнийитини қоғдаш үчүн паалийәт елип бериватқан уйғурларни бастуруватқанлиқини билдүрмәктә.

Хитай һөкүмити, уйғур бөлгүнчи вә исламий тәшкилатлириниң 1995‏- йилидин бери уйғур елидә 260 қетим террорлуқ һуҗуми елип барғанлиқини, бу һуҗумлар җәрянида 160 кишиниң өлгәнликини вә 400 кишиниң яриланғанлиқини билдүрмәктә. Әмма дипломатлар вә чәтәллик мутәхәссисләр, бу һуҗумларниң уйғур тәшкилатлири тәрипидин елип берилғанлиқиға гуман билән қаримақта. Уларниң ейтишичә, уйғур елидә һәмдә хитайниң башқа районлирида йүз бәргән бомбилаш вә партлитиш һәрикәтлириниң асаслиқ қисими айрим шәхисләр тәрипидин елип берилған үч елиш характерлик һуҗумлар икән. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.