Xitay hökümiti 18 neper sherqi türkistan térrorchisini öltürgenlikini jakarlidi


2007-01-08
Share

Xitay xewpsizlik da'iriliri, jüme küni Uyghur élining pakistan chégrisi yéqinidiki taghliq rayonda sherqiy türkistan islamiy herikitining lagirigha hujum qilip, 18 térror gumandarini öltürüp, 17 kishini tutqanliqini bildürdi. Uyghur élidiki jama'et xewpsizlik nazaritining naziri sung xungli, hujum jeryanida yüz bergen toqunushta bir xitay saqchisi ölgenlikini we bir saqchining yarilan'ghanliqini bildürdi. Uning éytishiche, saqchilar 22 dane granat we 1500 dane qurashturulmighan granatni qolgha chüshürgen hemde hujumda qéchip ketken térror gumandarlirini tutush üchün rayonda jiddiy heriket bashlatqan. Lékin ular hujum jeryanida qanche kishining qéchip ketkenliki heqqide birnéme démigen.

Xewpsizlik nazaritining bashliqi, weqening éniq qaysi yerde yüz bergenliki heqqide melumat bermigen. Emma radi'omizning igilishiche, mezkur weqe aqtu nahiyisining kosrap yézisida yüz bergen.

Xitay hökümiti uzundin béri, Uyghur élide Uyghurlarning qoralliq bölgünchilik herikiti élip bériwatqanliqini bayan qilip kelmekte. Lékin xelq'ara kishilik hoquq teshkilatliri hemde chet'ellerde pa'aliyet élip bériwatqan Uyghur teshkilatliri xitay hökümitining térrorchiliqqa qarshi urushtin paydilinip, özlirining milliy kimlikini we medeniyitini qoghdash üchün pa'aliyet élip bériwatqan Uyghurlarni basturuwatqanliqini bildürmekte.

Xitay hökümiti, Uyghur bölgünchi we islamiy teshkilatlirining 1995‏- yilidin béri Uyghur élide 260 qétim térrorluq hujumi élip barghanliqini, bu hujumlar jeryanida 160 kishining ölgenlikini we 400 kishining yarilan'ghanliqini bildürmekte. Emma diplomatlar we chet'ellik mutexessisler, bu hujumlarning Uyghur teshkilatliri teripidin élip bérilghanliqigha guman bilen qarimaqta. Ularning éytishiche, Uyghur élide hemde xitayning bashqa rayonlirida yüz bergen bombilash we partlitish heriketlirining asasliq qisimi ayrim shexisler teripidin élip bérilghan üch élish xaraktérlik hujumlar iken. (Qanat)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet