Xitay, xelq'arani térrorchiliqqa qarshi hemkarliqni kücheytishke chaqirdi

• 
  2005-09-08

Xitay jama'et xewpsizlik ministirliqi Uyghur musteqilchilirini térrorchiliq bilen eyiblep uzun ötmeyla, xitay tashqi ishlar ministirliqi peyshenbe küni xelq'ara jem'iyetni térrorchiliqqa qarshi hemkarliqni kücheytishke chaqirdi hemde térrorchiliq mesilisini din yaki milliy mesilige baghliwélishqa qet'iy qarshi turidighanliqini bildürdi.

Xitay tashqi ishlar ministirliqining bayanatchisi chin gang muxbirlargha, 11 -séntebirdin kéyin, xelq'ara jem'iyitining térrorchiliq insanlarning ortaq düshmini dégen ortaqliqqa kelgenlikini, shunga xelq'ara jem'iyetning öz- ara hemkarlashqan asasta térrorchiliqqa zerbe bérishi lazimliqini bildürdi.

U sözide yene, " biz 4 yildin buyan térrorchiliqning teltöküs yoqitilmighanliqini körüp turuptimiz. Mesilen, türkiye, en'gliye, kéniye qatarliq jaylarda arqa-arqidin térrorchiliq weqeliri yüz bérip keldi. Xitaymu xelq'ara térrorchiliqning ziyankeshlikige uchrighuchidur" dep bildürdi.

Chin gang yene, térrorchiliqqa qarshi turushning, birleshken döletler teshkilatining asasiy qanun belgilimilirige we xelq'ara qanun'gha ri'aye qilishi kéreklikini tekitlep, xitay terepning térrorchiliq mesilisini din we milliy mesilige baghliwélishqa qarshi turidighanliqini bildürdi.

Amérika da'iriliri térrorchiliqqa qarshi urushni bashlighandin buyan, xitay hökümitini köp qétim bu urushtin paydilinip az sanliq milletlerni basturmasliqqa agahlandurup kelgen. Emma xitay da'iriliri bu bir nechche yillardin buyan küchining bériche Uyghur musteqilchilirini xelq'aragha térrorchi dep körsitip, özlirini térrorchiliqning qurbani qilip körsitishke tirishmaqta. (Peride)