Хитай пакистан билән болған 3 хил күчләргә ортақ зәрбә бериш һәмкарлиқ келишимини тәстиқлиди


2006.08.23

Хитайниң алий дәриҗилик қанун турғузуш оргини болған хитай дөләт кабинти сәйшәнбә күни "хитай-пакистан 3 хил күчләргә зәрбә бериш һәмкарлиқ келишими" ни тәстиқлиди.

Хитай хәвәр агентлиқиниң мәлум қилишичә, хитай ташқи ишлар министирлиқиниң муавин министири ву давей, 3" хил күчләр"гә зәрбә бериш келишиминиң икки дөләт сөһбити арқилиқ түзүлгәнликини һәмдә буниң хитай қануниниң асасий пиринсипиға вә хитай мәнпәәтигә мас келидиғанлиқини тәкитлиди.

2005‏- Йили 3‏-айниң 8-9‏- күнлири хитай, пакистан тәрәп вәкиллири бейҗиңда , икки дөләтниң 3" хил күчләр" гә зәрбә бериш һәмкарлиқи мәсилисидә сөһбәт өткүзгән. Кейин 5‏- април күни хитай ташқи ишлар министири ли җавшиң, пакистан ички ишлар министири афтаб әхмәтхан шерпав билән бирликтә бу келишмгә имза қойған иди.

Хитай даирилири бу келишимниң хитай дөләт кабинти тәрипидин мақуллинишиниң, хитай билән пакистанниң "‏3 хил күчләр" гә зәр бериш саһәсидики һәмкарлиқини күчәйтип, икки дөләт достлиқини техиму илгири сүрүшкә пайдилиқ болидиғанлиқини билдүрди.

Хитай буниңдин илгири пакистандин башқа йәнә, қирғизистан, қазақистан, таҗикистан вә өзбекистан қатарлиқ шаңхәй һәмкарлиқ тәшкилатиға әза дөләтләр биләнму бу келишимни түзгән иди. Пакистан болса, шаңхәй һәмкарлиқ тәшкилатиға әза болушни илтимас қиливатқан бир дөләт. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.