Xitay rehberliri chet'ellerdiki Uyghurlar bilen hemkarlishish yolini izdeshni kücheytmekte

Xitayning Uyghur élidiki radi'o-téléwiziye istansisining xewer töridiki uchurdin melum bolushiche, Uyghur aptonom rayonining re'isi isma'il tiliwaldi, uzun yillardin buyan shimaliy yawropada makanliship qalghan yuqiri awazliq naxshichi dilber yunusning Uyghur éligha kélip, özining sen'et nomurlirini körsitish we tejribe almashturush pa'aliyiti bilen shoghullan'ghanliqi munasiwiti bilen uning bilen körüshüp, uning xizmetlirini maxtighan.

Isma'il tiliwaldi dilber yunusni barghanla yerde shinjangning güllep yashnighan menzirisini teshwiq qilip, naxshiliri arqiliq téximu köp ademlerning shinjangni chüshinishi hem birlikte shinjangni qurush xizmitige qatnishishini qolgha keltürüsh üchün teshwiqat qilishqa chaqirghan.

Xewerlerge qarighanda, xitay hökümiti yéqindin buyan bir tereptin Uyghurlarning musteqilliq we kishilik hoquqi pa'aliyetliri bilen shughullan'ghan Uyghurlarni basturushni kücheytip, weten ichi -sirtidiki Uyghur pa'aliyetchilirini térrorchi dep eyiblise, yene bir tereptin chet'ellerdiki bir qisim Uyghurlar bilen alaqe ornitip, ulargha melum imtiyaz we shara'itlarni yaritip bérish arqiliq, ularni chet' ellerde dawamlishiwatqan Uyghur pa'aliyetlirini xelq'ara jemiyetning aldida qarilashqa hemkarlashturmaqta. Shu arqiliq Uyghur mesilisining xelq'aralishishining aldini élishqa tirishmaqta.

Bu jehette qazaqistandiki bir qisim Uyghur rehberlirining xitay bilen yéqin hemkarlishishi Uyghurlarning naraziliqini qozghighan idi. (Ümidwar)