Сәндоңда уйғур оқуғучилар билән хитай оқуғучилар арисида тоқунуш йүз бәрди

6 - Айниң 27 вә 28 - күнлири сәндоң санаәт пәнлири университетида оқуватқан уйғур оқуғучилар билән мәзкур мәктәптики хитай оқуғучилар арисида тоқунуш йүз берип, аз дегәндә бәш нәпәр уйғур оқуғучи хитай оқуғучилар тәрипидин еғир яридар қилинди.

Хәвәрләргә қариғанда яридар оқуғучиларниң бири һазирға қәдәр хәтәрдин қутулалмиған. Вәқә, хитай оқуғучиларниң мәзкур мәктәптики бир уйғур оқуғучи билән бир хитай оқуғучи оттурисида йүз бәргән шәхси маҗраға арлишишидин келип чиққан. Нәтиҗидә маҗраға уйғур оқуғучилар арлишишқа мәҗбур болған.

200 Дин артуқ хитай оқуғучи мәзкур университетниң чәтәл тил иниститутидики уйғур оқуғучилар ятақиға бастуруп кирип, 5 нәпәр уйғур оқуғучини еғир яриландуған. Оқуғучилар ятиқи хитайлар тәрипидин вәйран қилинған.

Бу җәрянда зибо шәһәрлик даириләр қораллиқ сақчиларни ишқа салған болуп, 27 - июн кәчтә башланған җидәлни әтиси әтигән саәт 3 тә аран бастурған. Оқуғучилар шу күндин башлап тәтилгә қоюп бериләтти. Хитай мәтбуатлириниң хәвәр қилишичә, даириләр вәқәни миллий мәсилигә ятидиған интайин назук мәсилә, дәп қариған шундақла җамаәт хәвпсизлик даирилирини вәқә үстидин тәкшүрүш елип беришкә буйруған. (Әркин)