Тумшуқ шәһирини тәрәққи қилдуруш сүрити тизлитилмәктә


2006.03.19
Share on WhatsApp
Share on WhatsApp

Буниңдин 4 йил илгири хитай дөләт ишлири комитети тумшуқни наһийә дәриҗилик шәһәр қилип бекиткәндин буян, хитай һөкүмити бу шәһәрниң тәрәққияти сүритини тезлитип, бу җайниң қурулуш вә иқтисадий тәрәққиятиға зор көләмдә мәбләғ салмақта.

Хитай ахбарат васитилиридин шинҗаң иқтисад гезитиниң учур беришичә, тумшуқ шәһәр даирилири бу шәһәрниң сода, баҗ, йәр-мүлүк, пул-муамилә, ихтисаслиқларни қобул қилиш қатарлиқ түрлүк саһәлири бойичә қолайлиқ шараит яритип, техиму көп тиҗарәтчиләрни җәлип қилиш арқилиқ бу шәһәрни алаһидә иқтисадий район қилип қуруп чиқиш, шу арқилиқ карханилар вә содигәрләрниң бу йәргә мәбләғ селишини қолға кәлтүрүшни пиланлиған.

Шәһәр даирилири тумшуқниң қирғизистанға тутушидиған торғат еғизи, пакистанға тутушидиған қонҗирап еғизлириға баридиған муһим өткәллик алаһидилики һәмдә бу йәрниң чегра содиси, чәтәлләр билән сода алақә қилишқа қолайлиқ шараитидин пайдилинип, сиясәтниң муқимлиқи вә узун изчиллиқиға капаләтлик қилиш, карханичиларға пайда бериш һәм уларни хатирҗәм қилиш арқилиқ шәһәрниң раваҗлинишини илгири сүрмәкчи болған.

Тумшуқ шәһирини қуруп чиқишни хитай ишләп чиқириш қурулуш армийисиниң 3 -дивизийиси зиммисигә алған болуп, шәһәр ичи вә униң әтрапида " биңтүән" ниң бирқанчә деһқанчилиқ мәйданлири җайлашқан.

Әслидин уйғур йезиси һесабланған тумшуқ, хитай ишләп чиқириш қурулуш армийисиниң уйғур елиниң җәнубидики муһим мәркизий нуқтилириниң биригә айланған.

Уйғур көзәткүчилириниң қаришичә, хитай һөкүмити тумшуқни шәһәр қилиш арқилиқ бу йәрни худди шималдики шихәнзидәк, тәклимакан әтрапидики әң чоң хитай шәһири қилип қуруп чиқип, хитай һөкүмитиниң уйғур елиниң җәнубидики хитай нопусини уйғурлардин нәччә һәссә ашуруш арқилиқ бу йәрни контрол қилиш истратегийиси үчүн хизмәт қилдуридикән. (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.