Tumshuq shehirini tereqqi qildurush süriti tizlitilmekte

Buningdin 4 yil ilgiri xitay dölet ishliri komitéti tumshuqni nahiye derijilik sheher qilip békitkendin buyan, xitay hökümiti bu sheherning tereqqiyati süritini tézlitip, bu jayning qurulush we iqtisadiy tereqqiyatigha zor kölemde meblegh salmaqta.

Xitay axbarat wasitiliridin shinjang iqtisad gézitining uchur bérishiche, tumshuq sheher da'iriliri bu sheherning soda, baj, yer-mülük, pul-mu'amile, ixtisasliqlarni qobul qilish qatarliq türlük saheliri boyiche qolayliq shara'it yaritip, téximu köp tijaretchilerni jelip qilish arqiliq bu sheherni alahide iqtisadiy rayon qilip qurup chiqish, shu arqiliq karxanilar we sodigerlerning bu yerge meblegh sélishini qolgha keltürüshni pilanlighan.

Sheher da'iriliri tumshuqning qirghizistan'gha tutushidighan torghat éghizi, pakistan'gha tutushidighan qonjirap éghizlirigha baridighan muhim ötkellik alahidiliki hemde bu yerning chégra sodisi, chet'eller bilen soda alaqe qilishqa qolayliq shara'itidin paydilinip, siyasetning muqimliqi we uzun izchilliqigha kapaletlik qilish, karxanichilargha payda bérish hem ularni xatirjem qilish arqiliq sheherning rawajlinishini ilgiri sürmekchi bolghan.

Tumshuq shehirini qurup chiqishni xitay ishlep chiqirish qurulush armiyisining 3 -diwiziyisi zimmisige alghan bolup, sheher ichi we uning etrapida " bingtü'en" ning birqanche déhqanchiliq meydanliri jaylashqan.

Eslidin Uyghur yézisi hésablan'ghan tumshuq, xitay ishlep chiqirish qurulush armiyisining Uyghur élining jenubidiki muhim merkiziy nuqtilirining birige aylan'ghan.

Uyghur közetküchilirining qarishiche, xitay hökümiti tumshuqni sheher qilish arqiliq bu yerni xuddi shimaldiki shixenzidek, teklimakan etrapidiki eng chong xitay shehiri qilip qurup chiqip, xitay hökümitining Uyghur élining jenubidiki xitay nopusini Uyghurlardin nechche hesse ashurush arqiliq bu yerni kontrol qilish istratégiyisi üchün xizmet qilduridiken. (Ümidwar)