Xitay saqchiliri ili wilayitide 179 tungganni tutup ketken

Yéqinda xitay saqchi da'iriliri ili wilayitide "rezil dinlargha qarshi turush herikiti" ni élip bérip, bu yerdiki 179 neper tunggan salar musulmanlirini qanunsiz diniy pa'aliyetler bilen shughullan'ghan dep tutup ketken.

Dunya Uyghur qurultiyining bayanatchisi dilshat rishitning bildürishiche, islam dinigha étiqad qilidighan bu tungganlar, salar millitining özige xas étiqad qilish usuli bolghan "salar" diniy pa'aliyitige choqunidighan bolup, xitay da'iriliri ularni qanunsiz yighilish pa'aliyetlirini uyushturghan we pen- téxnikigha hemde jem'iyetke qarshi diniy teshwiqatlarni qilghan dégen eyibleshler bilen tutqun qilghan. Shundaqla ular hazirghiche qoyup bérilmigen.

Ili wilayitidiki féng isimlik bir xitay saqchi amérika birleshme agéntliqining téléfon ziyaritini qobul qilghanda, özlirining nöwette heqiqeten "rezil dinlargha qarshi turush herikiti" ni élip bériwatqanliqini étirap qilghan bolsimu, emma tutqun qilish weqesini inkar qilghan.

"Salar" xitayning chingxey we gensuda olturaqlashqan islam dinidiki salar millitining özige xas bir diniy étiqad pa'aliyiti bolup, ular bu pa'aliyitide sewr- taqet, yol qoyush, edep- hörmet we addiy- saddiliqni terghip qilidu. Shundaqla buninggha asasliqi salar we tungganlar étiqad qilidu. (Peride)