Ezerbeyjanda türkiy döletlirining qérindashliq qurultiyi chaqirildi


2007-11-18
Share

Ezerbeyjanning paytexti baku shehiride türkiy döletliri we jem'iyetlirining 11-qétimliq dostluq, qérindashliq we hemkarliq qurultiyi chaqirildi. Mezkur qurultaygha ezerbeyjan prézidénti ilham eliyéw sahibxanliq qilghan bolup, buninggha yene türkiye bash ministiri rejep tayip erdoghan we sabiq türkiye prézidénti sulayman demirel qatarliq her qaysi türk döletlirining yuqiri derijilik rehberliri ishtirak qilip söz qilghan.

Ezerbeyjanning milliy agéntliqi "day-az"ning xewer qilishiche, bu yighin'gha türkiye, ezerbeyjan, qazaqistan, qirghizistan, özbékistan, türkmenistan qatarliq türkiy musteqil jumhuriyetliri wekilliridin bashqa rusiye tewesidiki tataristan, bashqurtistan, chuwashiye, daghistan, qabardino-balqariye, qarachay-chérkes, altay, xakasiye qatarliq türkiy jumhuriyetlerning wekillirini öz ichige alghan dunyadiki 30 dölettin kelgen, 550 neper wekil ishtirak qilghan.

Bu qurultaygha Uyghur wekillirimu ishtirak qilip, Uyghurlarning nöwettiki weziyiti heqqide melumat bergen.

Qurultayning meqsiti türkiy döletler hem xelqler arisidiki munasiwetlerni rawajlandurush, türkiy xelqler medeniyitini teshwiq qilish, medeniyet alaqilirini kücheytish, iqtisadiy munasiwetlerni kéngeytip, türk dunyasining mesililirini hel qilish yollirini tépishtin ibarettur.

Qurultayda yene ermen-ezerbeyjan, taghliq qara bagh toqunushi, iraq we afghanistandiki türkiy tilliq ahalilar mesilisi we bashqa türk dunyasigha munasiwetlik bir qatar rayon xaraktérliq mesililer muzakire qilin'ghan.

Ezerbeyjan "day-az" agéntliqining uchurida éytilishiche, türkiye bash ministiri rejep tayip erdoghan " türkiy tilliq memliketliri dölet bashliqlirining da'imiy sékrétariyati" qurushni teshebbus qilghan. Tayip erdoghan ötken qétimqi qurultayda qazaqistan prézidénti nursultan nazarbayéwning türkiy xelqlerning parlaméntliri we ziyaliyliri birleshmisi qurush idiyisini teshebbus qilghanliqi, nöwette bu tekliplerning emeliyleshtüriliwatqanliqini eskertken.

" Bularning hemmisi bizning qolimizda, men ishinimenki, bularni emeliyleshtürüshte bizlerning küchimiz bar,ishinimenki, bizning kelgüsidiki hemkarliqlirimiz we qérindashliqimiz téximu mustehkem bolidu, eger biz bularni qilalmisaq biz kelgüsi ewladlirimiz aldida gunahkar bolimiz" deydu türkiye bash ministiri rejep tayip erdoghan qurultayda. (Ümidwar)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet